Militärischi Sändaalag Pierre-sur-Haute

Us der alemannische Wikipedia, der freie Dialäkt-Enzyklopedy
Zivili (Bildmitti) un militärischi Sändaalag Pierre-sur-Haute

Di militärisch Sändaalag Pierre-sur-Haute isch e dryssg Häktar groß Gländ, wu vu dr franzesischen Armee fir di militärisch Kommunikation mit Richtfunk gnutzt wird. Si lyt uf em Gipfel vum 1631 m hoche Bärg Pierre-sur-Haute[1] im Biet vu dr Gmaine Sauvain un Job. Dur s Grundstuck verlauft d Gränze zwische dr Département Puy-de-Dôme un Loire un dr Regione Rhône-Alpes un Auvergne.

Gschicht[ändere | Quälltäxt bearbeite]

Anne 1913 isch dert e optischer Telegraf im Chappe-System ufgrichtet wore. Zue sällere Zyt hets nume ne chlai Hysli us Stai mit em optische Telegraf uf em Dach gee.

Anne 1961, im Chalte Krieg, het d NATO di franzesisch Armee bätte, aini vu dr 82 Statione vum Funknetz ACE High ufzböue, wu im Gegesatz zum Churzewällefunk au noch eme Atomchrieg het solle funktioniere. In däm Netzwärch isch d Station Pierre-sur-Haute mit em Ruefzaiche FLYZ e Relais zwische dr Station Lachens (FNIZ) im Siden un dr Station Mont-Août (FADZ) im Norde gsi. S sin vier 10-kW-Sänder (zwee pro Richtig) un sächzeh Empfänger (acht pro Richtig) yyesetzt wore. Anne 1974 hän di franzesische Luftstrytchreft di Laitig vu dr Staiton ibernuu.. 1988 het d NATO aagfange s ACE-High-System stillzlege.

Anne 2013 het dr franzesisch Inlandsghaimdienscht DRCI e Mitarbaiter vu dr franzesischesprochige Wikipedia unter Aadrohig vu Untersuechigshaft zwunge, dr Wikipedia-Artikel zue dr Sändaalag z lesche; dr Artikel isch no churzer Zyt widerhärgstellt wore.[2][3][4]

Aktuälli Funktion[ändere | Quälltäxt bearbeite]

Zivili (links) un militärischi Aalag

D Sändaalag Pierre-sur-Haute wird vu dr franzesische Luftwaffe bedribe un isch dr Radarainheit Base aérienne 942 Lyon-Mont Verdun unterstellt, wu 80 km wyt ewäg isch. Si isch aini vu dr vier Funkstatione an dr franzesische Nord-Sid-Achse, wu in ständiger Kommunikation mitenander sin. Di andere drei sin: Lacaune, Henrichemont un dr Militärflugplatz Rochefort. D Station wird vor allem fir Funkverchehr im Zämmehang mit dr Fierig vu operative Ainhaite brucht. Wän franzesischi Atomwaffe sotten yygstetz wäre, chennt dr Abschussbefähl iber die Station wyterglaitet wäre.

Syt ihre Grindig am 1. Juni 1994 isch d Station Dail vu dr Commandement Air des Systèmes de Surveillance d’Information et de Communications gsii. Ab em 1. Jänner 2006 isch d Station dr Direction interarmées des réseaux d'infrastructure et des systèmes d'information unterstellt wore.

Rund 20 Mitarbaiter sin vor Ort, dodrunter Elektromechaniker, Mechaniker un Chech. D Station wird vun eme Major glaitet;[5] dää Rang in dr franzesischen Armee entspricht eme dytsche Oberstabsfäldwäbel (NATO-Rangcode OR-9).

Näbe dr militärische Nutzig unterhaltet dr Rundfunkkonzärn TDF dert e Sändaalag. Derzue het s uf em zivile Sänddurm au ne Radar-System, wu vu dr Direction générale de l’aviation civile bedribe wird un dr Luftruum un d Flugbewegige vum Flughafe Lyon Saint-Exupéry iberwacht un sicheret.

Fueßnote[ändere | Quälltäxt bearbeite]

  1. Geoportal vum franzesische Wirtschaftsminischterium un vum Energiminschterium: Topografischi Charte (Memento vom 28. Juli 2014 im Internet Archive); abgruefen am 6. April 2013
  2. La DCRI accusée d'avoir illégalement forcé la suppression d'un article de Wikipédia (französisch) Le Monde. 6. April 2013. Abgrüeft am 7. April 2013.
  3. Tristan Vey: La DCRI fait pression sur un bénévole pour supprimer une page Wikipédia (französisch) Le Figaro. 6. April 2013. Archiviert vom Original am 7. April 2013. Abgrüeft am 7. April 2013.
  4. Französischer Geheimdienst verlangt Löschung eines Wikipedia-Artikels. Deutschlandfunk. 6. April 2013. Abgrüeft am 7. April 2013.
  5. Paul-Emile Liogier (2004): La base militaire de Chalmazel; Television Loire 7; Reportage iber d Funkstation Archivlink (Memento vom 11. Septämber 2012 im Internet Archive); abgruefen am 6. April 2013

Weblink[ändere | Quälltäxt bearbeite]

 Commons: Militärischi Saändaalag Pierre-sur-Haute – Sammlig vo Multimediadateie

Koordinate: 45° 39′ 11,1″ N, 3° 48′ 30,4″ O

Dä Artikel basiert uff ere fräie Übersetzig vu dere Version vum Artikel „Militärische_Funkstation_Pierre-sur-Haute“ vu de dütsche Wikipedia. E Liste vu de Autore un Versione isch do z finde.