Mia Aegerter

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Mia Aegerter
Geburtsname Myriam Aegerter
Uf d Wält cho 9. Oktober 1976
Fryburg im Üechtland
Beschäftigung Schauspiilere, Musiker
Instrument Vokalist
Aktiv 1998 bis hützudag

D Mia Aegerter (* 9. Oktober 1976 als Myriam Aegerter z Fryburg im Üechtland) isch e Fryburger Pop-Sängeri un Schauspiileri. Bekannt worde isch si vorallem durch mehreri Näbe- un Hauptrolle in schwizerische un dütsche Film, un durch ihri drüü Albe. Si singt un schauspiilert uff Schwyzerdütsch, Hochdütsch un Änglisch.

Biografi[ändere | Quälltäxt bearbeite]

D Mia Aegerter isch z Düdinge im Kanton Fryburg inere musikalische Familie uffgwachse. Ihri Muetter isch Gitarrelehreri un spiilt inere Band, wie au de Vater, wo Schlagzüüg spiilt. Scho als Chind het si aagfange Musik mache un in Theaterstügg schauspiilere. 1997 isch si für es Joor in d Vereinigte Staate un het dörte Gsang un Theater glehrt. Näbem Bärndütsch un Hochdütsch redt si no Änglisch un Französisch. Nooch de Sekundarschuel z Düdinge un de Matura am Collège Saint-Michel z Fryburg isch si 1998 uff Münche go aa de Musicalakademi Gsang, Tanz un Schauspiil studiere. Erschti Ufftritt het si 1998 bim Imitatorewettbewerb in de Sändig Lass Dich überraschen gha, wo si gwunne het, un si isch in de Soundmixshow mit em Titel „Torn“ vo de Natalie Imbruglia uffträte. Usserdäm isch si als Tänzeri im Videoclip Doubledecker vo de Band Liquido uffträte. Spööter isch si uff Berlin, wo si vo 2000 bis 2003 in de Serie Gute Zeiten – Schlechte Zeiten Ufftritt als „Xenia di Montalban“ gha het. 2002 isch si mit eme Pleura-Erguss in s Spital cho, un het miesse d Ufftritt für 6 Monet unterbreche.

Am Aafang vo 2003 isch d Mia zum erschte Mool als Sängeri uffgfalle, wo ihri Debut Single „U don't know how to love me“ in d Top-20 vo de Schwyzer Single Charts cho isch. 2003 het si deno de Prix Walo in de Kategori "Newcomer 2003" un de SWISS AWARD erhalte. Im glyche Joor isch si usserdäm in de Rolle vo de „Laura Moretti“ im Schwyzer Film Achtung, Fertig, Charly uffträte. Si het au de Titelsong vum Film Hie u Jetzt gsunge, wo im Spootjoor 2003 in d Top-5 vo de Schwyzer Single Charts cho isch. Am 1. April 2004 het si für des Lied de VIVA COMET in de Kategori „Best CH Act“ gwunne. Ihr Debutalbum „So wie i bi / The way I am“ isch 2004 erschiine, un isch bis uff Platz 5 in de Schwyzer Charts cho. Im glyche Joor het s Jugendmagazin Bravo TV vum ZDF moderiert. 2004/2005 isch mit ere eigne Band uffträte, un het zum Byspil im Vorprogramm vo de Dütschlandtour vum Ronan Keating gspiilt.

Am 8. Januar 2005 het si de SwissAward in de Kategori „Showbusiness“ übecho. Dernäbe isch si no in de Jury vo 2004/05 Ussgab vo de TV-Show MusicStar uff SF DRS gsi. Am 12. März 2005 het si mit „Alive“ aa de dütsche Vorentscheidig zum Eurovision Song Contest 2005 teilgno, wo si uff de 3. Platz cho isch. Au 2005 het si d wyyblichi Hauptroll im Schwyzer Film Leben auf Kredit gspiilt.

D Single „Meischterwärk“ ussem zweite Album „Vo Mänsche u Monschter/Of Humans and Monsters“ isch am 12. Mai 2006 erschiine; s Album sälber isch am 9. Juni in d Läde cho, un in de erschte Wuch uff Platz 21 vo de Schwyzer Charts cho. D Single het sich dergege nit guet verchauft, un de Vertrag un d Zämmearbet mit de Plattefirma un em Management isch beändet worde. Usserdäm isch si in däm Joor Jury-Mitgliid in de Sändig „Musicstar“ gsi.

Am 30. Januar 2009 isch ihr dritts Album „Chopf oder Buuch“ veröffentlicht worde. In de erschte Wuch isch s Album uff Platz 17 vo de Schwyzer Charts cho.

Im März 2009 isch de Mystikthriller Hinter Kaifeck in d Kinos cho, wo d Mia Aegerter d Roll vo de „Viktoria Gruber“ spiilt. Dernäbe schrybt si e monatlichi Kolumne in de Neue Luzerner Zeitung.

Diskografi[ändere | Quälltäxt bearbeite]

Single[ändere | Quälltäxt bearbeite]

  • U don't know how to love me (2003)
  • Hie u jetzt / Right here right now (2003)
  • So wie i bi (2004)
  • Alive (2005)
  • Meischterwärk (2006)
  • Land in Sicht (2009)
  • Du bisch mini Heimat feat Polo Hofer (2012)

Albe[ändere | Quälltäxt bearbeite]

  • So wie i bi / The way I am (2004)
  • Vo Mänsche u Monschter / Of Humans And Monsters (2006)
  • Chopf oder Buuch (2009)
  • Gränzgängerin (2012)

Filmografi[ändere | Quälltäxt bearbeite]

Film[ändere | Quälltäxt bearbeite]

Serie[ändere | Quälltäxt bearbeite]

Weblink[ändere | Quälltäxt bearbeite]