S Riich vo Magadha

Us der alemannische Wikipedia, der freie Dialäkt-Enzyklopedy
Magadha im 5. Jh. v. d. Z.

Magadha isch e nordostindischs Köönigriich im 6. und 5. Joorhundert vor dr Zitewändi gsi.

Es isch äins vo sächzää Groosstammdümer gsi, de sogenannte Mahajanapada, und het öbbe s Gebiet vom hütige indische Bundesstaat Bihar umfasst. D Hauptstadt isch Rajagriha gsi, spööter Pataliputra, s hütige Patna. Im 3. Joorhundert vor dr Zitewändi het sich drus s Riich vo dr Maurya-Dünastii entwigglet, wo s erste indische Groossriich gsi isch. Däm si grösst Herrscher isch dr Kaiser Ashoka gsi, und under iim isch d Usdeenig vo Magadha am grösste gsi und s Land het e kulturelli Blüetezit erläbt.

S Zentrum vom antike Buddhismus[ändere | Quälltäxt bearbeite]

In Magadha isch dr Buddhismus entstande. Dört si die antike buddhistische Zentre, wie Bodhgaya und Nalanda, vo wo us sich die nöiji Religion noch em dritte buddhistische Konzil au in andere Däil vo Indie het afo verbräite.

Köönig[ändere | Quälltäxt bearbeite]

Über die früeje Herrscher vo Magadha wäiss mä nid vil Sichers. Die wichdigste Kwelle si buddhistischi Chronike us Sri Lanka, d Puranas und verschidnigi buddhistischi und jainistischi häiligi Teggst.

D Shishunaga Dünastii[ändere | Quälltäxt bearbeite]

Uf dr Basis vo deene Kwelle gseet s us, wie wenn Magadha öbbe 200 Joor lang vo dr Shishunaga-Dünastii regiert worde isch (öbbe vo 550 bis 350 v. d. Z.)

D Liste vo de Köönig noch de Chronike us Sri Lanka:

  1. Bimbisara (het 52 Joor lang regiert)
  2. Ajatashatru (32 Joor; vom Buddha nimmt mä aa, ass er im 8. Regierigsjoor vom Ajatashatru gstorbe isch)
  3. Udayin oder Udayibhadra (16 Joor)
  4. Anuruddha (öbbe 4 Joor)
  5. Munda (öbbe 4 Joor)
  6. Nagadasaka (24 Joor)
  7. Shishunaga (18 Joor)
  8. Kalashoka (28 Joor)
  9. Zää Söön vom Kalashoka, wo dr Nandivardhana von ene dr bekanntisti isch (22 Joor)

D Puranas gäbe en anderi Liste mit lengere Herrschaftszite (noch däm het d Shishunaga-Dünastii 321 Joor gherrscht):

  1. Shishunaga (40 Joor)
  2. Kakavarna (26 Joor)
  3. Ksemadharman (36 Joor)
  4. Ksemajit oder Ksatraujas (24 Joor)
  5. Bimbisara (28 Joor)
  6. Ajatashatru (27 Joor)
  7. Darsaka (24 Joor)
  8. Udayin (33 Joor)
  9. Nandivardhana (40 Joor)
  10. Mahanandin (43 Joor)

D Nanda Dünastii[ändere | Quälltäxt bearbeite]

D Shishunaga-Dünastii isch vom Mahapadma gstürzt worde, wo dr erst vo de nüün Nanda. Noch iim si acht Söön choo. Noch de Chronike us Sri-Lanka het d Nanda-Dünastii nume 22 Joor lang gherrscht, wääred d Puranas verzelle, ass dr Mahapadma 28 Joor lang regiert het und sini Söön 12 Joor lang.

D Maurya Dünastii[ändere | Quälltäxt bearbeite]

D Nanda-Dünastii isch woorschinlig vom Chandragupta Maurya zerstöört worde, wo dr erst Köönig vo dr groosse Maurya-Dünastii gsi isch.

  • Chandragupta Maurya (321/20– öbbe 297 v. d. Z.)
  • Bindusara (297–268 v. d. Z.)
  • Ashoka (268–232 v. d. Z.)
  • Kunala und Dasharatha (232–224 v. d. Z.)
  • Samprati (224–215 v. d. Z.)
  • Salisuka (215–202 v. d. Z.)
  • Devadharama (Devardharman) (202–195 v. d. Z.)
  • Satadhanvan (Satamdhanu) (195–187 v. d. Z.)
  • Brihadratha (187–180 v. d. Z.)

D Sprooch[ändere | Quälltäxt bearbeite]

Früener het mä dänggt, ass d Sprooch, wo z Magadha gschwätzt worde isch, s Magadhi, mit em Pali vom buddhistische Kanon idäntisch sig. Mä het sidder aber bewiise, ass es nid eso gsi isch.

Litratuur[ändere | Quälltäxt bearbeite]

Dä Artikel basiert uff ere fräie Übersetzig vum Artikel „Magadha“ vu de dütsche Wikipedia. E Liste vu de Autore un Versione isch do z finde.