Lothar Späth

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Lothar Späth (1983)

Dr Lothar Späth (* 16. Novämber 1937 z Simmeringa, Hochezollere) isch e dytsche Politiker (CDU) un Manager. Vu 1978 bis 1991 isch er Minischterpresidänt vu Bade-Wirttebärg gsi.

Dr Lothar Späth isch ghyrote un het mit syre Frau Ursula geb. Heinle e Suhn un e Dochter.

Effentligi Ämter un bolitischi Detigkeite[ändere | Quälltäxt bearbeite]

Noch em Bsuech vu dr Staatlige Verwaltigsschuel Stuegert isch dr Späth anne 1965 Byygordnete un Finanzreferänt vu dr Stadt Bietge-Bissinge wore. 1967 isch er dert zum Burgermeischter gwehlt wore. Vu 1970 bis 1974 isch er Gschäftsfierer vu dr Neuen Heimat z Stuegert un Hamburg gsi un bis 1977 au im Vorstand bzw. Ufsichtsrot vu dr Böufirma C. Baresel AG z Stuegert.

Anne 1968 isch er s erscht Mol as Abgordnete in dr bade-wirttebärgische Landdag gwehlt wore, 1972 isch er derno scho Vorsitzende vu dr CDU-Fraktion wore. Dr Minischterpresidänt Filbinger het ihm e baar Minischterämter aabotte, wun er zerscht abglänht gha het. Anne 1978 isch er schließli zum Inneminischter ernännt wore.

Dr Späth mit em Erich Honecker (1987)

Noch em Rucktritt vum Hans Filbinger wäge dr „Filbinger-Affäre“ isch dr Lothar Späth am 30. Augschte 1978 zum fimfte Minischterpresidänt vu Bade-Wirttebärg gwehlt wore. Är het sich innerhalb vu dr Landdagsfraktion geg dr Stuegerter Oberburgermeischter Manfred Rommel chenne dursetze, wu au Ambitionen uf s Amt gha het. Vu 1979 bis 1991 isch er Landesvorsitzende vu dr CDU vu Bade-Wirttebärg gsi, derno däre ihre Ehrevorsitzende, derzue vu 1981 bis 1989 stellvertretende Bundesvorsitzende vu dr CDU. Turnusgmäß isch er as Minischterpresidänt vu Bade-Wirttebärg vom 1. Novämber 1984 bis zum 31. Oktober 1985 Bundesrotspresidänt gsi.

Dr Späth het bi dr Landdagswahle 1980, 1984 un 1988 di absolut Mehrheit fir d CDU chene verdeidige, derwylscht di andre Bardeie stagniert sin. As Minischterpresidänt het er di wirtschaftlig Entwicklig vum Land firschidribe un het fir dr ökonomisch Erfolg dr Spitzname „Cleverle“ iberchuu. Wu dr Späth im Zämmehang mit dr „Traumschiff-Affäre“ Vordeilsnahm bi Feriereise vorgworfe woren isch, isch er am 13. Jänner 1991 vum Amt as Regierigsschef zruckdrätte un het am 31. Juli 1991 au syy Mandat as Landdagsabgordnete nidergleit. Syy Noofolger as Minischterpresidänt vu Bade-Wirttebärg isch dr CDU-Fraktionsvorsitzende Erwin Teufel wore. Syy Landdagsmandat het dr Oberburgermeischter vu Bietge-Bissinge ibernuu, dr Manfred List.

Im Bundesdagswahlkampf 2002 isch dr Späth as Schatte-Wirtschaftsminischter Mitglid im Schattekabinett vum Chanzlerkandidat Edmund Stoiber gsi.

Privatwirtschaft[ändere | Quälltäxt bearbeite]

Dr Lothar Späth, 2011

Dr Späth isch im Juni 1991 Gschäftsfierer vu dr Jenoptik GmbH z Jena wore, em Rächtsnoofolger vum VEB Carl Zeiss Jena, un het die am 16. Juni 1998 as Vorstandsvorsitzende as Aktiegsellschaft Jenoptik AG an d Börse gfiert. D Aazahl vu dr Mitarbeiter us dr Stammbelegschaft vu urspringli 30.000 im Johr 1990 isch zum Zytpunkt vum Börsegang nume no bi eppe 2.000 gläge. Dr Späth het syy Detigkeit im Vorstand vu dr Jenoptik AG im Juni 2003 ufghert. Bis hite isch umstritte, eb dr Rucktritt as Vorstandsvorsitzende frejwillig gsi isch oder eb er gangen isch, voreb Fähler im Zämmehang mit em Börsegang vu dr Jenoptik AG ufdeckt wore sin. Im April 1996 isch dr Späth Presidänt vu dr Induschtrii- un Handelschammere Oschtthüringe z Gera wore.

Vu 1997 bis 2001 het er all Wuche d Gsprechssändig Späth am Abend uf n-tv moderiert. Syt 2005 moderiert er wider e glyychnamigi Sändig, wu eimol im Monet uusgstrahlt wird.

Dr Späth het e Honorarprofessur fir Medien un Zytdiagnoschtik an dr Friedrich-Schiller-Universität Jena.

Im Mai 2005 isch er Vorsitzende vu dr Gschäftsfierig vu dr Investmentbank Merrill Lynch fir Dytschland un Eschtryych wore, derzue schafft er as Ufsichtsrotsvorsitzende vu dr Verlagsgruppe Georg von Holtzbrinck.

Syt Juli 2007 isch er Ufsichtsrotsvorsitzende vu dr J&M Management Consulting AG mit Sitz z Manne un vu dr Herrenknecht AG.

Ehreamt[ändere | Quälltäxt bearbeite]

Dr Lothar Späth isch Stifter vum Lothar-Späth-Pryys fir Chinschtler mit ere geischtige Behinderig un Botschafter vu dr Initiative Neue Soziale Marktwirtschaft. Syter anne 2004 isch er Jury-Mitglid vum Unternämmerpryys Entrepreneur des Jahres. Syt November 2009 isch er Vorsitzende vum Kuratorium vu dr Dänkmolstiftig Bade-Wirttebärg.

Syt em Spotjohr 2009 engagiert sich dr Lothar Späth fir s Sozialprojäkt Mir hälfe Afrika zue dr Fueßball-Wältmeischterschaft 2010 z Sidafrika. Är isch Stadtgetti fir syy Geburtsort Simmeringe.

Uszeichnigen und Ehrige[ändere | Quälltäxt bearbeite]

  • 1986 - Großchryz vum Verdienschtorde vu dr Italienische Republik
  • 1989 - Goldenes Schlitzohr
  • 1990 - Orden wider den tierischen Ernst vum Aachener Karnevalverein
  • 1992 - Königlich Norwegischer Generalkonsul für Thüringe un Sachse-Anhalt
  • 1992 - Verdienschtmedallie vum Land Bade-Wirttebärg
  • 1996 - Cicero Rednerpreis
  • 1997 - Ehreburger vu dr Stadt Jena
  • 2000 - Närrisches Steckenpferd vu dr Prinzegarde Krefeld
  • 2001 - Ehresenatorewird vu dr Akademie der Bildenden Künste München
  • 2002 - Dytsche Mittelstandspryys
  • 2003 - Verdienstorden vum Freistaat Thüringe
  • 2006 - Ehreburger vu dr Stadt Ulm un Ehredoktor vu dr Universitet Ulm.
  • 2009 - Ehrenpriis vum oberrhyynische Hochschuel-Ferderverein "Prix Bartholdi"

Literatur[ändere | Quälltäxt bearbeite]

  • Rudolf Leibinger und Horst Sund (Hrsg.): Zwischenbilanz. Festschrift für Lothar Späth anlässlich der Fertigstellung des Mischkreuzes der Universität Konstanz. Konstanz: Universitäts-Verlag Konstanz, 1988, XV, 498 S., ISBN 3-87940-337-6 (Mit Beiträgen von Eberhard Böning, Theopont Diez, Horst Eickmeyer, Helmut Engler, Kurt Georg Kiesinger, Johannes Jochims, Leonhard Neidhart, Götz Wienold, Burkhart Beyerle u. a.)
  • Marlis Prinzing, Lothar Späth - Wandlungen eines Rastlosen, Orell Füssli Verlag Zürich 2006, ISBN 3-280-05203-3

Weblink[ändere | Quälltäxt bearbeite]

 Allmänd (Commons): Lothar Späth – Sammlig vo witere Multimediadateie



Dä Artikel basiert uff ere fräie Übersetzig vu dere Version vum Artikel „Lothar_Späth“ vu de dütsche Wikipedia.

E Liste vu de Autore un Versione isch do z finde.