Leo V. (Papst)

Us der alemannische Wikipedia, der freie Dialäkt-Enzyklopedy

Dr Leo V. isch vu Augschte bis Septämber 903 fir rund 30 Däg (no andere Quälle vu Juli bis Septämber) Papscht gsii.

Iber dr Leo V. isch nume wenig bekannt. E bretonischi Legänd sait, ass dr St. Tugdual, dr Schutzpatron vu Tréguier, as Pilger uf Rom gange un dert zum Papscht glupft wore sei. Die Version wird doderdur gstitzt, ass dr Leo noch em remische Katelog dr Name „Leo britigena“ aagnuu het. En anderi Version sait, är heb us Priapi gstamme, eme Dorf in dr Nechi vu Ardea sildi vu Rom. Wel er bi syre Wahl nit zue dr Kardinalprieschter vu Rom ghert het, isch er in zytgnessische Bricht „Presbiter forensis“ gnännt wore.

Iber sy Wirken as Papscht isch nume bekannt, ass er e Bulle verfasst ghaa het, wu dr Kanoniker vu Bologna gwissi Styyre erloo het. Dr zytgnessisch Autor Auxilius het vun em gsait, ass er e Gottesmann gsii sei un ass sy Läbe un sy Hailigkait ruemwirdig gsii seie.

Noch er Amtszyt vu rund 30 Däg isch er vum Kardinalprieschter Christophorus vu St. Damasus gstirzt un inhaftiert wore. Dr Christophorus het sich zum Papscht gmacht, isch sälber aber im Jänner 904 vum Sergius III. gwaltsam gstirzt wore.

Iber dr Dod vum Leo waißt mer nyt Sichers. Ai Version sait, dr Christophorus heb en yygspeert un verworgt, en anderi git aa, sy Amtsnoofolger Sergius III. heb mit syne zwee inhaftierte Vorgänger „Mitlaid“ ghaa un heb si hiirichte loo. No dr Catholic Encyclopedia sei s am wahrschynligschte, ass er im Gfängnis oder in eme Chloschter gstorben isch. Syni Bainer wären im Lateran oder z St. Peter vermuetet.

Literatur[ändere | Quälltäxt bearbeite]

  • Klaus Herbers: Leo V. In: Lexikon des Mittelalters (LexMA). Band 5, Artemis & Winkler, Münche/Züri 1991, ISBN 3-7608-8905-0, Sp. 1878–1879.
  • Umberto Longo: Leone V. In: Massimo Bray (Hrsg.): Enciclopedia dei Papi. Band 2: Niccolò I, santo, Sisto IV. Istituto della Enciclopedia Italiana, Rom 2000, S. 59–60 (treccani.it)..

Weblink[ändere | Quälltäxt bearbeite]

 Commons: Leo V. – Sammlig vo Multimediadateie
  • Leo V., In: Salvador Miranda: The Cardinals of the Holy Roman Church, online uf fiu.edu, Websyte vu dr Florida International University, abgruefen am 22. November 2011. (änglisch)
  • Yydrag in dr Catholic Encyclopedia


Dä Artikel basiert uff ere fräie Übersetzig vu dere Version vum Artikel „Leo_V._(Papst)“ vu de dütsche Wikipedia. E Liste vu de Autore un Versione isch do z finde.