Leo V. (Byzanz)

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Leo V.
Kaiser vom Byzantinische Riich
E Solidus mit em Leo V. und sim Soon Konstantin druf
Regierigsziit 813 – 25. Dezämber 820
Uf d Wält cho 775
Gstorbe 25. Dezämber 820 (im Alter vo 45)
Vorgänger Michael I Rangabe
Nochfolger Michael II
Verhürotet mit Theodosia
Nochkomme Konstantin
Basil
Gregory
Theodosios
Vater Bardas
Follis vom Leo V.

Dr Leo V. (lateinisch; griechisch Leon Λέων, * um 775; † 25. Dezämber 820, Biinaame dr Armenier, isch dr byzantinisch Kaiser vo 813 bis 820 gsi.

Dr Leo(n) isch General under de Kaiser Nikephoros I. und Michael I. gsi. 812 het er sich uf em Fäldzuug gege d Araber uszäichnet und isch 813 bim Chrieg gege d Bulgare drbii gsi. Er het dr Kaiser Michael in dr Schlacht vo Adrianopel im Stich gloo und het zämme mit de Generääl Michael Psellos und Thomas Revolte gegen en gmacht und iin gstürzt. As Kaiser het dr Leo d Bulgare e baar mol gschlaage, wo si Konstantinopel in de 814 bis 817 belaageret häi. Er het denn mit iirem Khan Omurtag, wo vo 814 bis 831 regiert het, 816 e drissigjoorige Friidensverdraag abgschlosse.

Dr Leo het die ikonoklastischi (bilderfindligi) Politik vo de sürische Kaiser wider ufgnoo, wo milidäärisch seer erfolgriich gsi si. Ändi 814 isch er gege d Bildervereerer vorgange, wo under em Michael I. immer mee Iifluss am Hoof und im Klerus gwunne häi (lueg Dr byzantinisch Bilderstrit). Es het im Leo ghulfe, ass gröösseri Däil vo dr Bevölkerig vo Konstantinopel au bilderfindlig gsi si. Dr Patriarch Nikephoros isch 815 abgsetzt worde und meereri Gäistligi häi d Bolitik vom Kaiser abgleent und si in d Verbannig gange. D Fronte häi sich verhertet. Uf dr äinte Site d Riichschille, wo d Bolitik vom Kaiser akzeptiert het, uf dr andere e starki Opposizioon.

Im Leo si Fründ Michael Psellos het an ere Verschwöörig gegen en mitgmacht, aber si isch zu nüt choo und iiri Aafüerer si gfangegnoo worde. Aber denn isch dr Leo am Wienachtsoobe 820 in dr Balastkapälle ermordet worde, und dr Michael het dr Droon bestiige. Im Leo sini vier Söön si nid umbrocht worde, aber mä het sä kastriert, so dass si nüm as Droonaawärter in Froog cho si. Dr jüngst isch an de Folge gstorbe.

Über d Regierigszit vom Leo brichte vor allem dr Theophanes Continuatus, dr Ioseph Genesios und dr Johannes Skylitzes, aber au meereri klerikali Kwelle. Wil er en Ikonoklast gsi isch, häi en die Ikonodule, wo si im Bilderstrit gwunne häi, schlächt gmacht. In dr nöijere Forschig bedoont mä d Erfolg vom Kaiser, öbbe in dr Ussebolitik oder sini gsetzgääberische Maassnaame in dr Innebolitik.

Liddratuur[ändere | Quälltäxt bearbeite]

  • Leslie Brubaker, John F. Haldon: Byzantium in the Iconoclast era. c. 680–850. A History. Cambridge University Press, Cambridge u. a. 2011, ISBN 978-0-521-43093-7, S. 366ff.
  • Prosopographie der mittelbyzantinischen Zeit (PmbZ). 1. Abteilung. Bd. 2. Berlin 2000, S. 671ff. (Quellen und Literatur).
  • Dmitry Afinogenov: The Conspiracy of Michael Traulos and the Assassination of Leo V: History and Fiction. In: Dumbarton Oaks Papers 55 (2001), S. 329–338.
  • Warren Treadgold: The Byzantine Revival, 780-842. Stanford 1988, S. 196ff.

Weblingg[ändere | Quälltäxt bearbeite]

 Allmänd (Commons): Leo V. – Album mit witere Multimediadateie