Leda (Mythologie)

Us der alemannische Wikipedia, der freie Dialäkt-Enzyklopedy
Hops zue: Navigation, Suech

D Leda (gr. Λήδα) isch in dr griechische Müthologii d Dochter vom ätolische Köönig Thestios und vo dr Eurythemis. Iiri Schwöstere si d Althaia und d Hypermestra. Si isch d Frau vom schbartanische Köönig Tyndareos gsi.

Dr Müthos[ändere | Quälltäxt bearbeite]

D Gschicht vom Zöis und dr Leda isch scho in eltiste Ziten in ere andere Versioon überliiferet. Noch dere het sich dr Zöis nit in Leda, sondern in d Rachegöttin Nemesis verliebt.

Für dass si dr Zöis nid verwütschi, het d Leda sich noch enander in e Hufe verschidnigi Dier verwandlet, zum Schluss in e Gans. Sofort het dr Zöis d Gstalt vom ene schööne Schwaan aagnoo, het sä verfüert und gschwängeret.[1] Aber au iire Maa Tyndareos het in deere Nacht mit ere gschloofe. D Leda het denn zwäi Äier mit vier Chinder din geboore - vom Zöis d Helena und dr Polydeukes (latiinisch Pollux), vom Tyndareos d Klytaimnestra und dr Kastor, dorum si die erste bäide unstärblig gsi, die bäide andere aber stärblig.

D Helena, wo für iiri Schöönhäit berüemt gsi isch, het dr schbartanisch Köönig Menelaos ghürootet und isch spööter vom Paris uf Dröija entfüert worde. D Klytaimnestra drgeege het däm si Brueder Agamemnon, dr Köönig z Mykene, ghürootet. D het noch dr Entfüerig vo dr Helena d Grieche gege Dröija gfüert, zum d Helena zruggzbringe.

Es git Versioone, wo nume d Helena us eme Äi schlüpft, in andere chömme dr Kastor und Polydeukes us em gliiche Äi uf d Wält.[2]

Dr Kastor und dr Polydeukes wärde as d Dioskuure („Zöisjüngling“) bezäichnet (vgl. Kouros) und as göttligi Hälfer vo dr Schifffaart vereert.

In ere andere Versioon vom Müthos isch s göttlige Äi dr Leda vo dr Rachegöttin Nemesis, wo e Find vom ganze Köönigsgschlächt vo de Atriide, wil die emol gröiligi Daate begange häi, underschoobe worde. D Leda weer denn nume d Milchmueter vo dr Helena gsi.

In dr Kunst[ändere | Quälltäxt bearbeite]

In dr Kunstgschicht isch d Leda mit em Schwaan lang e beliebts erotischs Motiv gsi. E berüemti Darstellig, wo hüte verloore isch, het dr Michelangelo Buonarroti 1529/30 gmacht.

Galerii[ändere | Quälltäxt bearbeite]

Fuessnoote[ändere | Quälltäxt bearbeite]

  1. Panaghiotis Christou, Katharini Papastamatis: Griechische Mythologie. 2008, ISBN 978-88-476-2283-8. S.19
  2. Guus Houtzager: Griechische Mythologie-Enzyklopädie. Edition Dörfler im Nebelverlag, Eggolsheim 2006; S. 156

Weblingg[ändere | Quälltäxt bearbeite]

 Allmänd (Commons): Leda – Sammlig vo witere Multimediadateie
Dä Artikel basiert uff ere fräie Übersetzig vum Artikel „Leda_(Mythologie)“ vu de dütsche Wikipedia.

E Liste vu de Autore un Versione isch do z finde.