Chloschter Hermetschwiil

Chloschter Hermetschwiil

Chloschterchile

S Chloschter Hermetschwiil isch es Chloschter vo Benediktinerinne z Hermetschwiil im Kanton Aargau. S Chloschter isch uf eme chline Hoger am Weschtufer vo de Rüüss.

Gschicht

Vo 1083 bis 1798

S Chloschter Muri het im Johr 1083 nebem Mannechloschter au no en Frauekonvent übercho. Am End vom 12. Johrhundert sin d Nonne vo Muri denn uf Hermetschwiil züglet. S Chloschter het vo Muri Grundbsitz übercho un derzu verschidini Herrschftsrächt im Rüüsstal. Ab de Ziit um 1300 hei d Nonne sich sälber verwaltet, de Abt vo Muri het aber immer no d Leitig vom Chloschter gha.

Am Aafang het s Chloschter numme adligi Fraue als Nonne ufgno. So isch de Bsitz vom Chloschter schnell aagwachse. I de Ziit vo de Reformation het s Chloschter Problem gha, zumal s Freiamt i de Ziit vo 1529 bis 1531 reformiert worde isch.

Vo 1798 bis hüt

Mit de Helvetische Republik isch s End vo de alte Verhältnis cho, un s Chloschter het unter anderm sini Herrschaftsrächt verlore. Wie alli Aargauer Chlöschter isch au s Chloschter Hermetschwiil 1841 durch de Gross Rat ufghobe worde, was zum Aargauer Chloschterstrit gführt het. Ab 1843 hei d Nonne wiider dörfe z Hermetschwiil si. I de Zit vom Kulturkampf het me s Chloschter 1876 es zwaits Mal ufghobe un de Bsitz vom Chloschter vergantet. D Nonne hei dann im Johr 1878 en Teil vo de Aalage zruckkauft. Wil s Chloschter aber kei Novizinne het dörfe ufnäh, het me de Sitz vom Chloschter uf Habsthal im Schwäbische verlegt. Hermetschwil isch ab do numme no es Priorat gsi.

Sit em Johr 1985 het s Chloschter wider en Äbtissin und sit 1986 sin di beide Abteie Hermetschwil un Habsthal rechtlich nüm zämme.

Literatur

• Volker Reinhardt (Hrsg.): Handbuch der historischen Stätten. Schweiz und Liechtenstein. Stuttgart 1996, ISBN 3-520-28001-9

Weblink

 Commons: Chloschter Hermetschwiil – Sammlig vo Multimediadateie

• Anne-Marie Dubler: Chloschter Hermetschwil. In: Historisches Lexikon vo dr Schwiiz.