Kiddusch

Us der alemannische Wikipedia, der freie Dialäkt-Enzyklopedy
Kidduschbächer

As Kiddusch (hebräisch קידוש vo kadosch, häilig, dütsch wörtlig „Häiligung“, mänggisch „Sääge“), bezäichnet mä dr Sääge über eme Bächer Wii, wo mä mit em dr Schabbat und die jüüdische Fiirdääg iiläitet. Dr Kiddusch wird abgläitet us em 2. Buech Mose 20,8: „Dänk an dr Sabbatdaag, für dass du iin duesch häilige“.

Dr Kiddusch am Schabbat und an de Fiirdääg[ändere | Quälltäxt bearbeite]

Dr Kiddusch am Schabbat und an de Fiirdääg wird dehäi grad vor em Ässe gsäit. Im Allgemäine isch s dr Maa im Huus wo s macht, aber au Fraue müesse. Dr Kiddusch cha über Wii oder en anders Getränk gsäit wärde oder, wenn s käis het, über d Schabbatbroot. Aschkenasischi Juude säge am Friddigoobe e Kiddusch au in dr Synagoge. Das chunnt drvoo, ass früener Juude uf dr Räis in de Synagoge gässe häi.[1]

Doodrvo abgläitet isch e meer oder weeniger groosses Mööli,[2] wo in aschkenasische Gmäinde mäistens am Schabbat, aber mänggisch au an Fiirdääg, noch em Morgegottesdienst vo Mitgliider vo dr Gmäind bi bsundrige Gläägehäite aabote wird, und wo mä au as Kiddusch bezäichnet.[3] Es git Gmäinde won er hüte e feste Bestanddäil vom Lääbe vo dr Gmäind isch und vo dr Gmäind finanziert wird.[4]

Kiddusch HaSchem[ändere | Quälltäxt bearbeite]

As Kiddusch HaSchem, d Häiligung vom Naame (vo Gott), bezäichnet mä s Festhalten am jüüdische Glaube dur Martürium, Gebät und Lääbensfüerig. S Geegedäil vo Kiddusch HaSchem isch dr Chillul HaSchem, d Entweijig vom Naame (vo Gott).[1]

Fuessnoote[ändere | Quälltäxt bearbeite]

  1. 1,0 1,1 Julius H. Schoeps (Hg.): Kiddusch. In: Neues Lexikon des Judentums. Bertelsmann, Gütersloh/München 1992, ISBN 3-570-09877-X, S. 259 f.
  2. Chajm Guski: Neulich beim Kiddusch: Ein Kantor wie ein Rabe. Jüdische Allgemeine, 18. Februar 2010
  3. Kiddush. In: Gil Marks: Encyclopedia of Jewish Food. John Wiley & Sons Ltd., Hoboken NJ 2010, S. 310 ISBN 978-0-470-39130-3 auszugsweise online (änglisch)
  4. Gebetszeiten der Synagogen. Jüdische Gemeinden Frankfurt am Main