James Prescott Joule

Us der alemannische Wikipedia, der freie Dialäkt-Enzyklopedy
Hops zue: Navigation, Suech
James P. Joule

Dr James Prescott Joule ([ˈdʒuːl][1], * 24. Dezämber 1818 z Salford bi Manchester; † 11. Oktober 1889 z Sale isch e britische Pysiker gsii.

Läbe un Forschig[ändere | Quälltäxt bearbeite]

Dr Joule isch dr dritt Suhn vum Bröuereibsitzer Benjamin Joule (1784–1858) un dr Alice Prescott Joule gsii. Speter het är zämme mit sym Brueder die Bröuerei ibernuu un bedribe. Ab 1834 het dr John Dalton Mathematik un Naturwisseschafte studiert. Anne 1837 het er sich e chemisch Labor yygrichtet, wu speter vu verschidene Verain finanziert woren isch. Am 18. Augschte 1847 het er d Amelia Grimes ghyrote, wu scho anne 1854 gstorben isch. Im Johr 1847 het er syni Zämmearbet mit em William Thomson, 1. Baron Kelvin aagfange. Vu 1872 ab hän e gsundhaitligi Broblem blogt. Wun er in spetere Johr in finanziälli Schwirigkaite groten isch, het em di britisch Chenigi Victoria ab 1878 e Pension gwehrt.

Anne 1838 het dr Joule uf dr Grundlag vu dr Arbeite vum William Sturgeon mit elektromagnetische Experimänt aagfange, wun er derno wäg dr Wermilehr ufgee het. Ab 1840 het er sich Untersuechige iber d Wermiwirkige vum Strom gwidmet. Doderby het er s Ufwermig vum stromdurflossene Laiter (Joulschi Wermi) entdeckt. In däm Johr, 1840, het er s Joulesche Gsetz formuliert, doderno isch d Wermi proportional em Brodukt us em Quadrat vu dr Stromsterki un em Widerstand vum Stromkrais.

Joule-Apparat zum Noowys vu dr Equivalänz vu mechanischer Arbet un Wermi (mechanischs Wermiequivalänt).

In dr Johr derno het er d Wermientwicklig bi verschidene Vorgäng gmässe. Är het frie vermuetet, dass es e Equivalänz vu mechanischer Arbet un Wermi git (mechanischs Wermiequivalänt) un het doderzue 1843 e klassische un no ihm gnännte Versuech (Joule-Versuech) uus: Ere thermisch isolierte Wassermängi wird e definierti Mängi mechanischi Energi zuegfiert un derno dr Aastig vu dr Temperatur gmässe. Uf die Art het er d Wermiequivalänz chenne noowyse, wu ihm z Ehre in dr Ainheit Joule gmässe wird. Dää Noowys het fascht glychzytig un unabhängig vum Joule au dr Robert Mayer (1814–1878) vu Hailbrunn brocht.

Anne 1846 het dr Joule mit dr Lengineänderig vu magnetisierte ferromagnetische Stoff d Magnetostriktion (Joule-Effäkt) entdeckt, wun er gfunde het bi dr Erzygig vu Ultraschallwälle. Ab 1852 het dr Joule zämme mit em Thomson an Experimänt fir d Bstetigung vu thermodynamische Theorie gschafft. 1852 hän di beede Forscher zaigt, dass sich e Gas abchielt, wu sich uugstert cha uusdehnt. Dää Joule-Thomson-Effäkt isch dr Bewys gsii fir d Aanahm, dass zwische dr Gasmolekül schwachi Chreft wirksam sin. Aawändig findet dää Satz bi dr Gasverflissigung un in dr Cheltitechnik. Derzue het dr Joule dr ideal Kraisprozäss vu dr Haißluftmaschin (Joule-Prozäss) konzipiert.

Ehrige[ändere | Quälltäxt bearbeite]

Ab 1850 isch dr Joule Mitglid vu dr Royal Society gsii, wu ne 1852 mit dr Royal Medal un 1870 mit dr Copley Medal uuszaichnet het. Zue syne Ehre haißt d SI-Ainhait vu dr Energi, Arbet un Wermimängi „Joule“ (Ainhaitezaiche J).

Wärch[ändere | Quälltäxt bearbeite]

  • New theory of heat, 1850

Fueßnote[ändere | Quälltäxt bearbeite]

  1. Zitat Oxford English Dictionary (OED): "Although some people of this name call themselves dʒaʊl, and others dʒəʊl, it is almost certain that J. P. Joule (and at least some of his relatives) used dʒuːl.

Weblink[ändere | Quälltäxt bearbeite]

 Allmänd (Commons): James Prescott Joule – Sammlig vo witere Multimediadateie

Wikisource James Prescott Joule im dütschsprochige Wikisource

Dä Artikel basiert uff ere fräie Übersetzig vu dere Version vum Artikel „James_Prescott_Joule“ vu de dütsche Wikipedia.

E Liste vu de Autore un Versione isch do z finde.