Jakob Greber

Us der alemannische Wikipedia, der freie Dialäkt-Enzyklopedy

Dr Jakob Greber (begraabe am 5. Juli 1731) isch e dütsche Barockkomponist im früeje 18. Joorhundert gsi.

Lääbe und Wärch[ändere | Quälltäxt bearbeite]

S Datum und dr Ort won er uf d Wält choo isch, si umbekannt. Au wenn er gstorbe isch, wäiss mä nid genau; im Grove Dictionary of Music and Musicians isch gschriibe, ass er am 5. Juli 1731 z Mannheim begraabe worde isch.

Im ene Verzäichnis vo Komponiste, wo us em Franzöösische übersetzt worde isch und 1709 z London erschiine isch, wird dr Greber as a German who had Study'd Composition in Italy erwäänt. Er isch woorschinlig mit dr toskanische Sängere Francesca Margarita de l'Epine uf Ängland choo. Am 27. Mai 1703 isch zum erste Mol brichtet worde ass si ufdräte isch. Z Ängland het men en as „Signor Giacomo Greber“ kennt. D de l'Epine isch offesichtlig im Greber si Geliebti gsi, het aber spööter en andere Komponist, dr Johann Christoph Pepusch ghürootet. Am 9. April 1705 isch im Greber si Pastorale Gli amori d'Ergasto bi dr Eröffnig vom nöije Queen's Theatre (spööter King's Theatre) am Haymarket ufgfüert worde. Das isch die erst italiänischi Opere gsi, wo z London ufgfüert worde isch. S Wärk het käi Erfolg ghaa. E Zitli druf het dr Greber London verloo und und isch 1707 Kapällmäister vom Herzog Karl Philipp, em Statthalter vom Tirol, z Innsbrugg worde. Dört het er ee festa teatrale („Theatralisches Fest“) mit em Ditel L'allegrezza dell' Eno komponiert. Es isch 1708 zu Eere vo dr Elisabeth Christine vo Braunschweig-Wolfebüttel ufgfüert worde, wo die uf Spanie zu iirem Maa Erzherzog Karl gange isch und z Innsbrugg duurechoo isch. Mä het Gli amori d'Ergasto woorschinlig 1711 wider ufgfüert, wo z Wien d Droonbestiigig vom Kaiser Karl VI. gfiirt worde isch. Wo dr Johann Wilhelm 1716 gstorbe isch, isch si jünger Brueder, dr Herzog Karl Philipp, Kurfürst vo dr Pfalz worde, und er het dr Greber in sine Dienst bhalte. Noch dr Hoofliste vo 1723 si dr Greber und dr Johann Hugo vo Wilderer denn gliichzitig as Kapällmäister aagstellt gsi.

Gli amori d'Ergasto isch as handschriftligi Partitur in dr Nazionalbibliothek Wien erhalte. Usserdäm si vom Greber no säggs Büünewärk bekannt, wo mä von ene aber nume d Libretti het, und vier Solokantate und e Kammerkantate.

Kwelle[ändere | Quälltäxt bearbeite]

  • Grove Dictionary of Music and Musicians, Bd. 7.
  • Musik in Geschichte und Gegenwart, Bd. 5.
Dä Artikel basiert uff ere fräie Übersetzig vum Artikel „Jakob_Greber“ vu de dütsche Wikipedia. E Liste vu de Autore un Versione isch do z finde.