Ilira Gashi

D Ilira Gashi (*1994 z Brienz) isch e albanisch-Schwyzer Sängeri uss Bärn. Dr Vater vo dr Ilira stammt ussem Kosovo, ihri Mueter us Albanie, si sälber isch in de Schwyz uff d Wält cho un uffgwaggse. Zurzit (2011) bsuecht si di 10. Klass z Bärn. S Singe het si sich autodidaktisch un spööter mit Gsangsstunde aa de Musikschuel Köniz bybrocht.

Im Joor 2010 het si mitem Lied „Shoku im i ngushte“ bi de 7. Ufflag vum albanische Gsangsfestival Top Fest mitgmacht. Im November 2010 het si usserdäm am albanische Gsangswettbewerb Kënga Magjike z Tirana teilgno. Si isch mit em Lied „Tek“ aaträtte, het aber kei Pryys gwunne.

2011 isch si zämme mit de Band The Colors im Wettbewerb zur Verträtig vo de Schwyz im Eurovision Song Contest 2011 mitem Lied „Home“ aaträtte. De Liedteggst isch uff Albanisch un Bärndütsch, un handlet vo de Sueche nooch de eigne Wurzle un Heimet. Di andre Mitgliider vo de Band sin de Fabian Liechti aa de Gitarre, de Andreas Renggli am Piano, de Adrian Pasquinelli am Bass, d Annette Huber mit de Gyyge un de Manuel Pasquinelli am Schlagzüüg gsi. S Lied Home isch bis in s Finale cho, het's deno aber mit 13.05% vo de Stimme numme uff de 3. Platz gschafft. Verträteri vo de Schwyz isch d Anna Rossinelli mit „In Love For A While“ worde.

2011 isch si usserdäm wiider bi Top Fest mitem Lied „Ëndërr“ uffdrätte.

Weblink

• Interview mit de Ilira Gashi
• Bericht uff SF
• S Video vum Lied Home