Hans Bock der Ältere

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Dialäkt: Baseldütsch

Dr Hans Bock dr Elteri (um 1550 bis 1624) isch e Basler Mooler, Zeichner und Geometer gsi.

Läbe[ändere | Quälltäxt bearbeite]

Dr Hans Bock isch um 1550 im elsässische Zabere uf d Wält cho. Er het wohrschiinlig z Strossburg e Lehr gmacht. 1570 isch er Gsell bim Hans Hug Kluber z Basel worde und zwäi Joor spööter isch er in d Himmelszumft ufgnoh worde. 1573 het er d Elisabeth Kleinmann ghürotet. Im gliiche Johr het er au d Basler Bürgerschaft übercho. 1585 het er em Kluber siiner Witwe s Huus «Zum Susen» am Bluemerain für 400 Pfund abkauft. Siini Söhn Hans dr Jünger, Felix, Emanuel dr Elteri, Peter und Nicolaus hai mit em in siiner Wärkstatt gschafft, wo si grooss worde si.

Wärk[ändere | Quälltäxt bearbeite]

Portret vom Felix Platter

Im Basler Roothuus het er 1579 d Wärk vo Hans Holbei em Jüngere restauriert, wo sälle 1521 im domolige Groossrootssaal gmoolt het. 1586 isch d Allegorii "Tag und Nacht" und 1597 s "Bad zu Leuk" entstande. 1600 hai är und siini Söhn en 18-deilige Mariezyklus für St. Blasie im Schwarzwald gmoolt, wo mä hüte no z Eisiidle cha aaluege. Zwüsche 1608 und 1611 het dr Bock im Roothuus eigeni Wärk gmacht: Er het über de Portal s Stadtwappe gmoolt und Siigesgöttinne mit Palmzwiig und e Chinderfestumzug abbildet. 1608/09 si vo ihm au d Wärk «Josaphat ermahnt die Richter» und «Herodes von Hyrcanus» an de sitlige Wänd vom Innehof under de Arkade entstande. Über dr Rootsstääge het er s «Jüngste Gericht» dargstellt. As Mooler gältet er as Nochfolger vom Holbei.

Vo iiflussriiche Baslern wie em Felix Platter und em Basilius Amerbach het er as wüsseschaftlige Zeichner Ufdräg übercho. In de 1580er het er für e Amerbach die römische Ruine z Augusta Raurica zeichnet und für e Platter dr «Luzärner Riis».

As Geometer het dr Bock 1588 dr Grundriss vo Basel vermässe und 1611-16 dä vo Colmar. 1623 het er e Stadtblan vo Basel zeichnet.

Weblingg[ändere | Quälltäxt bearbeite]