Habicht

Happech

Happech
Happech (Accipiter g. gentilis)
Systematik
Chlass: Vögel (Aves) Ordnig: Griifvögel (Falconiformes) Familie: Happechartigi (Accipitridae) Gattig: Happech und Sperber (Accipiter) Art: Happech
Wüsseschaftlige Name
Accipiter gentilis
(Linnaeus, 1758)

De Happech oder au Hüennerwai (Accipiter gentilis; alemanischi Näme) isch e Raubvogel, wo i Mitteleuropa dor s ganze Joor döre vorchunnt. I de Alpe isch er bis zonere Hööchi vo 2200 müM verbraitet. Er isch recht schüüch und und selte i de Nööchi vo Sidlige aaztreffe. De Happech gsiet äänlich uus wie de Sperber isch aber gröösser.

Uussie

De Happech isch e graubruune Vogel, wo a de Undersiite liecht gstraifflet isch. Sin lange Schwanz und sini braite Flögel sind dunkel und eener bloilich. Jungi Happech sind mee rootbruu und hend a de Undersiite wiisslichi Straiffli. S Mandli oder de Terzel isch mit öppe 50 cm vill chlinner as Wiibli, wo öppe 60 cm groos werd. D Spannwiiti isch öppe 95 cm bzw. 110 cm. Happech chönd öber e Kilo schwer were.

Lebeswiis

De Happech lebt i uufglockrete Wälder mit vill Altholz und baut uf Bömm inere Hööchi zwöschet 10 und 16 Meter e groosses Nest us grüene Äst. Happechpäärli bliibet anenand för s ganz Lebe troi und si bruucht eri Nester au meriri Joor. Happech sind gschickti wendigi Flüüger. Si hocket anere guete Stell und schüüset zunderainisch uf s Opfer loos. Zu de Büüti ghööret chliini Vögel, aber au Chraie, Orlihään und Hüenner und au Süüger wie Müüs, Aichörnli und Hase.

Bsundrigs

De Happech werd för d Jagd abgrichtet.

Büecher

• Heinz Staffelbach: Handbuch Schweizer Alpen; Bern 2008.ISBN 978-3-258-06895-4
• Stefan Ineichen (Hrsg.): Stadtfauna, 600 Tierarten der Stadt Zürich; Bern 2010; ISBN 978-3-258-07561-7