Händel-Festspiele Halle (Saale)

D Händel-Festspiil z Halle an dr Saale si s grösste Muusigfest im Land Sachsen-Anhalt. Die Festspiil im Georg Friedrich Händel sinere Geburtsstadt si s Zentrum dr öiropäische Pflääg vom Händel sim Wärk.

1922 het s die erste Händel-Festspiil z Halle gee. 1925 het dr Hermann Abert d Händel-Gsellschaft gründet und denn het si 1929 wider e Festspiil veraastaltet. Dr 250. Geburtsdaag vom Händel isch 1935 dr Grund für e witers Festspiil gsi.

Churz noch em Ändi vom Chrieg häi dr Erich Neuß, dr Max Schneider, dr früeneri hallischi Kulturdezernänt Herbert Koch und anderi e nöiji Hallische Händel-Gesellschaft gründet, zum d Dradizioon vo de Händel-Festspiil witerfüere. 1948 häi denn s Landestheater, die Evangelischi Chillemuusigschuel und d Muusighochschuel im Händel-Huus, wo dr Komponist uf d Wält choo isch, non e Festspiil veraastaltet.

Sit 1952 finde d Festspiil jeedes Joor im Juni statt und wärde offiziell vo dr Stadt Halle organisiert. Drbii schaffe d Mitarbäiter vo dr Martin-Luther_Uniwersidäät und d Redakzioon vo dr Hallische Händel-Usgoob äng zämme. Sit 1993 wird im Raame vo de Festspiil dr Händel-Briis vergee.

Bi jeedem Festspiil wird mindestens äi Händel-Opere am Operehuus Halle ufgfüert und e Gastinszenierig am Goethe-Theater z Bad Lauchstädt. Es wärde au Wärk vo Komponiste us Sachsen-Anhalt, wo im Händel noostöön, ufgfüert. Sit 1922 si mee as 100 34 vo de 42 Händel-Opere inszeniert worde. S Ziil vo de Festspiil isch s, em Publikum s ganze Wärk vom Händel vorzstelle.

2006 häi die Hallische Festspiil mit em Leipziger Bachfest afo kooperiere zum mee internazionali Bsuecher aazie.

Sit em 1. August 2009 isch dr Muusigwüsseschaftler und Germanist Clemens Birnbaum dr Diräkter vo dr Stifdig Händel-Huus und dr Intendant vo de Händel-Festspiil z Halle. D Diräkzioon vo de Festspiil befindet sich im Händel-Huus. Dört het s au e Muusigmuseum mit ere Duurusstellig über s Lääbe und s Wärk vom Händel.

Litratuur[ändere | Quälltäxt bearbeite]

Karin Zauft: Händel und die Händel-Festspiele in Halle, deutsch/englisch, Mitteldeutscher Verlag, Halle 2001

Weblingg[ändere | Quälltäxt bearbeite]

Dä Artikel basiert uff ere fräie Übersetzig vum Artikel „Händel-Festspiele_Halle_(Saale)“ vu de dütsche Wikipedia. E Liste vu de Autore un Versione isch do z finde.