Grofe vu Fryybeg

Dialäkt: Undermarkgreflerisch

D Grofe vu Fryybeg sin d Noofaare vum Grof Egino V. vu Urach († 1236 oder 1237) gsi. Däm syy Mueter isch d Agnes vu Zährige gsi, wäge däm het är chenne s Erb vu dr Zähriger aadrätte. As Grof vu Fryybeg het er si Egino I. gnännt. Syy Suhn isch dr Konrad I. (1236/1237 bis 1272) gsi, unter däm syyre Herrschaft isch s vor 1245 (?) zue dr Erbdeilig mit em Firschtehuus Firschtebärg chuu. In dr Noofolog vu dr 1218 uusgstorbene Zährigerherzeg hän d Grofe vu Fryybeg syt em 13. Johrhundert iber d Stadt Fryybeg un dr Bryysgau gherrscht.

E Suhn vum Egino II. mit Namme Heinrich het anne 1272 di sidlige Biet mit dr Herschaft Badewyyler iberchuu. D Grofe us däre Linie sin anne 1303 ohni männligi Noochumme uusgstorbe, ihri Bsitzige sin derno an d Grofe vu Straßberg gange, wu in die Linie yyghyrote gha hän. Unter em Konrad I. isch dää Bsitz anne 1385 wider an d Grofe vu Fryybeg zruckchuu.

Wel s allmeh Stryt gee het um d Finanze, het sich d Fryybeger Burgerschaft anne 1368 fir 20.000 March Silber vu dr Grofe vu Fryybeg losgchauft un sich unter dr Schutz vum Huus Habsburg gstellt.

No 1368 hän d Grofe vu Fryybeg nume in ihre im Side vu Fryybeg glägene Bsitzige gherrscht uf dr Burg Nejestei z Badewyyler. Dur Erbschaft isch anne 1395 d Grofschaft Neueburg an d Grofe vu Fryybeg chuu.

Dr Johann, dr letscht vu dr Grofe vu Fryybeg, het anne 1444 syyni Herrschaft Badewyler an d Sihn vu syym Näffe, em Markgrof Wilhelm vu Hachberg-Susebärg vermacht, dr Rudolf un dr Hugo. Dur dr Zämmeschluss vu dr Herrschaft Röttele, Susebärg un Badewyyler isch derno s Markgreflerland entstande. D Grofschaft Neueburg het dr Johann em Rudolf IV. vermacht.

Lischt vu dr Grofe vu Fryybeg

• Egino I. (as Grof vu Urach Egino V.) (bis 1236/37)
• Konrad I. (1236/37–1271)
• Egino II. (1271–1316)
• Konrad II. (1316–1350)
• Friedrich (1350–1356)
• Klara (1356–1358)
• Egino III. (1358–1368), † 1385

1368 isch d Stadt Fryybeg an s Huus Habsburg ibergange.

As Herre vu Badewyyler

• Konrad III. (1385–1424)
• Johann (1424–1444, † 1457)

Lueg au

• Zähriger

Literatur

• Eva-Maria Butz: Adelige Herrschaft im Spannungsfeld von Reich und Region. Die Grafen von Freiburg im 13. Jahrhundert. Freiburg 2002
• H. Haumann, H. Schadek (Hrsg.): Geschichte der Stadt Freiburg, Bd. 1: Von den Anfängen bis zum „Neuen Stadtrecht” von 1520. Stuttgart 1996
• Arthur Kleinschmidt: Egon III.. In: Allgemeine Deutsche Biographie (ADB). Band 5, Duncker & Humblot, Leipzig 1877, S. 691 f.

Weblink

• Die Grafen von Freiburg im Kampfe mit ihrer Stadt, oder …: Historischi Abhandlig vum Heinrich Hansjakob (1867)
• Heinrich Schreiber: Der letzte Graf von Freiburg (Wikisource)
• Anne Jeanneret-de Rougemont: Freiburg, Konrad von. In: Historisches Lexikon vo dr Schwiiz.
• Anne Jeanneret-de Rougemont: Freiburg, Johann von. In: Historisches Lexikon vo dr Schwiiz.