Grünliberale Partei

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Basisdate
Gründigsdatum: 2004 (Kanton Zürich)
2007 (Nationali Bardei)
Präsidium: Martin Bäumle
Generalsekretärin: Sandra Gurtner-Oesch
Mitgliider: 2'000[1]
(Stand: 2009)
Fraueaadeil: im Nationalroot: 33,3 %
im Ständeroot: 50 %
(Stand: 2010)
Durchschnittsalter: im Nationalroot: 44
im Ständeroot: 61
(Stand: 2010)
Wähleraadeil: 1,4 %[2]
(Stand: Nationalrootswahl 2007)
Nationalroot: 3 Sitz (1,5 %)
Ständeroot: 2 Sitz (4,4 %)
Kantonali Parlament: 40 Sitz
(Stand: Oktober 2010)
Kantonali Regierige: 0 Sitz
(Stand: Septämber 2010)
Parteigliiderig: 14 Kantonalparteie
Website: www.grunliberale.ch

Die Grünliberali Partei (glp; frz.: Parti vert’libéral, PVL; ital.: Partito Verde-Liberale, PVL; rät.: Partida Verda-Liberala, PVL) isch e politischi Bardei in dr Schwiiz. Bis jetzt git s 14 Kantonalbardeie z Züri, Sanggalle, Basel-Landschaft, Bärn, Zug, Thurgau, Basel-Stadt, Graubünde, Luzärn, Aargau, Solodurn, Freiburg, Waadt und Gämf.[3] D Bardei het 2007 zum erste Mol in d Kantön Züri und Sanggalle bi de Nationalrootswahle mitgmacht und z Züri drei Sitz überchoo.

Gründigsgschicht[ändere | Quälltäxt bearbeite]

Die Grüenliberali Bardei vom Kanton Züri[ändere | Quälltäxt bearbeite]

Die Grüenliberali Bardei Kanton Züri het sich 2004 vo de Grüene Kanton Züri abgspaltet, wo dr Balthasar Glättlianstatt vom Martin Bäumle zum Presidänt vo dr Zürcher Grüene Bardei gwehlt worden isch. Innerhalb vom ene Johr si fast 300 neuji Mitgliider dr neue Bardei bidräte.

Die Grüenliberale si zerst vom Martin Bäumle im Nationalroot und bis Mai 2007 vo dr Verena Diener im Zürcher Regierigsroot verdräte gsi. Die beide si ursprünglig nid as Mitgliider vo dr Grüenliberale Bardei gwehlt worde, sondern si vo de Grüenen überdräte.

Aafangs 2006 hai die Grüenliberale zum erste Mol in e baar Gmeinde mit eigene Liste bi de Wahle mitgmacht, so au bi de Gemeindirootswahle vo dr Stadt Züri, vo Winterthur, Uster und Opfike. Während si in Züri wäge dr Fümfprozäntklausle keini Sitz übercho hai, hai si z Winterthur 2 vo 60 Mandat und z Uster und Opfike je 2 vo 36 gha. Mit em Martin Luchsinger as Stadtrootskandidat si die Grüenliberale in dr Stadt Züri au zum erste Mol für en Exekutivwahl aadräte, är isch aber, wie erwartet, nid gwehlt worde.

Bi de Kantonsrootswahle am 15. April 2007 het d glp en usserordentlige Wahlerfolg erziilt und het zäh Sitz überchoo. Denn het mä aagfange au in andere Kantön grüenliberali Bardeie z gründe. Bi de Groossrootswahle im Kanton Thurgau am 6. April 2008 het d glp zwei Sitz im Kantonsroot überchoo.[4]

Bi de Gemeindirootswahle im Kanton Züri am 7. März 2010 si die Grüenliberale d Gwünner gsi:[5] Si hai zwölf Sitz in dr Stadt Züri überchoo, si z Winterthur vo zwei uf sächs Sitz gstiige, z Uster vo zwei uf vier und z Opfike uf drei Sitz.

Die nationali Bardei[ändere | Quälltäxt bearbeite]

Die Grüenliberale vo de Kantön Züri und Sanggalle hai am 20. Juli 2007 offiziell e nationali Bardei gründet. Die beide Kantonalsektione hai sich an de Schwiizer Parlamäntswahle 2007 bedeiligt. Bi de Nationalrootswahle het d glp 1,4 % vo de Stimme gwunne und isch mit drei Sitz im Nationalroot verdräte. Dr widergwehlti Martin Bäumle und die Neugwehlte Tiana Moser und Verena Diener stammen alli us dr Zürcher Kantonalbardei. Die früehneri Zürcher Regierigsröötin Verena Diener isch im zweite Wahlgang au in dr Ständeroot gwehlt worde; uf ihre Nationalrootssitz isch dr Thomas Weibel noochgruckt.

D glp het sich mit dr CVP und dr EVP für die 48. Legislaturperiode vom Nationalroot in ere gmeinsame Fraktion zsämmedoo. As Grundlag dodrfür isch e Sterkig vo dr politische Middi verbunde mit eme Füehrigsaaspruch aagfüehrt worde.[6]

Politischi Iiornig[ändere | Quälltäxt bearbeite]

Die Grüenliberale gsehn sich as Bardei vo dr politische Middi und stöhn nit linggs wie die Grüeni Bardei vo dr Schwiiz. Si wei e liberali Wirtschafts- und Gsellschaftspolitik konsequänt mit ere nochhaltige Umwältpolitik verbinde. Differänze zur ehemolige Mueterbardei bestöhn bsundrigs in wirtschafts- und finanzpolitische Frooge.

Organisation[ändere | Quälltäxt bearbeite]

Dr Presidänt vo dr Bardei uf nationaler Ebeni isch dr Martin Bäumle.

D Zürcher Kantonalbardei wird vom ene Co-Presidium gleitet: dr Tiana Moser und em Thomas Maier.

Fuessnote[ändere | Quälltäxt bearbeite]

  1. NZZ Online, 25. April 2009
  2. parlament.ch, 6. Juli 2010
  3. Grünliberale Partei – Kantonale Parteien
  4. Medienmitteilung Kanton Thurgau, 6. April 2008
  5. NZZ: Grünliberale als Gewinner der Zürcher Gemeinderatswahlen
  6. Schweizer Fernsehen: Grünliberale und EVP bandeln mit CVP an

Weblingg[ändere | Quälltäxt bearbeite]