Giovanni Battista Bononcini

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Dr Giovanni Battista Bononcini

Dr Giovanni Battista Bononcini, mänggisch au Giovanni Battista Buononcini (* 18. Juli 1670 z Modena; † 9. Juli 1747 z Wien) isch en italiänische Tschellist und Komponist gsi.

Lääbe[ändere | Quälltäxt bearbeite]

As Chind het dr Bononcini musikalische Underricht vo sim Vater Giovanni Maria Bononcini überchoo, wo z Modena Chillemusiker gsi isch. Wo dä 1678 gstorbe isch, het dr Bononcini bim Giovanni Paolo Colonna z Bologna gleert. Zää Joor spööter isch er dört Chillemusiker worde. Dr Librettist Silvio Stampiglia het für en Libretti gschriibe und dr Bononcini het vo 1692 bis 1696 fümf Opere komponiert.

1692 isch er uf Rom 1696 über Venedig uf Wien. Er isch Mitgliid in dr Hoofkapälle vom Kaiser Leopold I. worde und het as Komponist Erfolg gha. 1702 isch z Berlin d Uruffüerig vo sinere Opere Polifemo gsi, wo groosse Erfolg gha het. Bis 1711 isch er z Wien bliibe, denn isch er uf Venedig und Rom und dört het en s italiänischi Operehuus in London angaschiert, won er e Riwaal vom Händel worde isch. Vo 1720 bis 1724 isch er bi dr Royal Academy of Music in London gsi, wo au dr Händel und dr Attilio Ariosti as Komponiste gschafft häi. Wo dr Bononcini 1727/28 behauptet het, äär häig s Madrigal In una siepe ombrosa gschriibe, wo aber vom Antonio Lotti gsi isch, het er käini Ufdrääg me überchoo und isch uf Bariis. 1735 isch für e Joor z Lissabon gsi.

1737 het er dubioosi Spekulazioone gmacht und vil Gäld verloore. Spööter isch er zum Hoof uf Wien, und het vo 1741 aa vo dr Kaisere Maria Theresia e Bangsioon überchoo. 1747 isch er z Wien gstorbe.[1]

Wärk[ändere | Quälltäxt bearbeite]

Astianatte, c. 1727

Opere (im Ganze 27)

  • Alessandro in Sidone (1737)
  • L'amore eroica fra pastori (1696)
  • Astianatte (1727)
  • Astarto (1720)
  • Calphurnia (1724)
  • Cefalo (1702)
  • La clemenza di Augusto (1697)
  • Crispo (1721)
  • Etearco (1707)
  • La fede pubblica (1699)
  • Griselda (1722)
  • Mario fuggitivo (1708)

Sustigs

  • 300 Kantate
  • 4 Missa Brevi (1688)
  • Laudate pueri (fümf Stimme und Orchester, 1733)
  • Te Deum (1741)
  • Madrigal
  • Triosonate Trattimenti da camera à tre op. 1 (1685)
  • Triosonate Concerti da Camera à tre op. 2 (1685)
  • Sinfonia op.3-6
  • Divertimenti da Camera (1722)
  • 12 Kammersonate (1732)

Weblingg[ändere | Quälltäxt bearbeite]

Fuessnoote[ändere | Quälltäxt bearbeite]

  1. Lääbenslauf und Wärkeverzäichnis uf dr Website haendel.it
Dä Artikel basiert uff ere fräie Übersetzig vu dere Version vum Artikel „Giovanni_Battista_Bononcini“ vu de dütsche Wikipedia.

E Liste vu de Autore un Versione isch do z finde.