Gerhard Jung

Gerhard Jung

Dr Gerhard Jung (* 10. Augschte 1926 z Zäll im Wisedal; † 25. April 1998 z Lörrach-Stette) isch e dytsche Dialäktdichter un -liedermacher gsi. Er isch bsundersch im Schwarzwald fir syyni Gedichte bekannt un isch hite no beliebt.

Läbe

Dr Gerhard Jung isch im Wisedal ufgwagse. Syy Vater, Karl Jung, isch e Dierarzt vu Franke gsi, syy Mueter, Hermine Huusfrau. Dr Jung het drej Gschischter gha. Är isch z Zäll uf d Volksschuel gange un z Schopfe uf s Gymnasium. Vu 1946 bis zue syyre Pensionierig 1981 isch er b dr Boscht gsi. As Oberamtmann het d Uusbildig vum mittlere un ghobene Boschtdienscht zue syyne Ufgabe ghert. Unter dr vile Lehrbuebe het er het er vil Mänsche gfunde, wu ne nit nume as Lehrer un Uusbilder gsäh hän, nei, au as Frynd un Vorbild.

Dr Jung het frejberueflig as Heimetdichter gschafft. Derzue isch er in vile Verein Mitglid vum Vorstand gsi un au Motor un Rotgeber. No syyre Pensionierig het er sich ganz syyre große Lyydeschaft gwidmet, em Schryybe. Wel er stark vu dr Chriegsjohr bregt gsi isch, hän d Theme Fride un Versehnig zue dr Schwärpinkt vu syyne Text zellt. Eis vu syne bekannteschte Wärch isch s Buech "Bettmümpfeli", wu bis zue sibte Uflag scho 35000 Exemplar dervu verchauft wore sin. Bim Dichte isch bim Jung alliwyl im Vordergrund, "dr Mänsche ne Heimet schaffe" z chenne.

Dr Jung het 60 chleineri un mittleri Dialäktstuck gschribe, wu im Archiv für alemannische Mundartspiele Denzlingen ufbewahrt wäre. Vil Stuck het er fir d Hotzewälder Freilichtbühne Klausenhof e. V. z Herrischried schribe.

Dr Gerhard Jung het mit syyre Frau Klara geb. Wuchner, zwe Sihn, Karlheinz un Markus Manfred Jung un e Dochter, Sabine Maria Ging, gha. Dr Markus Manfred Jung isch hit e erfolgryyche Dialäktschriftsteller.

E Hegschtpunkt in syym Schaffe isch aafangs vu dr 1970-er Johr gsi, wu dr Jung mit dr Johann-Peter-Hebel-Plakette dur d Gmei Huuse im Wisedal un em Johann-Peter-Hebel-Pryys vum Land Bade-Wirttebärg uuszeichnet woren isch.

Dr Heimtdichter, wu im Schwarzwald bis hite populär isch, isch anne 1998 z Lörrach im Kreis vu syyre Familie gstorbe.

Dr Jung isch Ehremitglid vu dr Drachtegruppe Zäll im Wisedal (1971) gsi un vum Bund Heimat und Volksleben (1987), derzue Ehreburger vu dr Stadt Zäll im Wisedal (1986) vu dr Huuse im Wisedal (1997).

Wärch

Biecher

• D'Heimet uf em Wald (1960)
• Schmecksch de Brägel (1966)
• Wurzle un Blatt (1968)
• Bettmümpfeli (1971)
• Wo ane gohsch? (1973)
• Rutsch e bizzeli nöcher (1977)
• Uf de Schwelle (1980)
• Proscht Gürgeli (1983)
• Loset, wie wär's? (1983)
• Sonnenwende (1985)
• Im Wandel der Jahreszeiten (1986)
• E Flämmli glüeht (1987)
• Im Schwarzwälder Herrgottswinkel (1989)
• Souvenierli us em Schwarzwald (1991)
• Morgen kommt der Schwed (1992)
• Rutsch no ne bizzeli nöcher (1993)
• Im Belchenwind (1993)
• Mit e me Bleistiftstümpli (1995)
• Seifiblodere (1995)
• Herrgott isch des schön (1996)

Tonträger

• Alles was schön isch (1976)
• Rutsch e bizzeli nöcher (1986)
• Schwarzwälder Buuremess (1986)
• S Lumpepuppeli (2000)

Theaterstuck

• Die Herrischrieder Hochzeit (1983)
• Der Schatz im Hotzenwald (1985)
• Die Weiber von Dogern (1986)
• Gueti alti Zit (1988)
• Bernau 1848 (1990)
• Morgen kommt der Schwed (1991)
• Was für e Zit (1992)
• Der Schmied von Dogern (1992)
• Gugelfuhr (1995)
• Ein Tag im April (1998)
• Vater, wir kommen in Dein Haus (1998)

Uszeichnige

• Johann-Peter-Hebel-Priis: 1974
• Johann-Peter-Hebel-Plakette: 1973
• Guldi Ehrezeiche fir bsunderi Verdienscht um dr Schwarzwaldverein (1974)
• Guldi Ehrezeiche vum Bund Heimat und Volksleben (1977)
• Verdienschtmedallie vum Land Bade-Wirttebärg (1980)
• Oberryynische Kulturpryys: 1983
• Verdienschtmedallie vu dr Gmei Herrischried (1993)
• Grand Prix de Poesie vu dr Stadt Anze (1996)
• Medallie vum Landchreis Waldshuet in Silber, zämme mit syyre Frau (1996)
• Bundesverdienschtchryz (1997)

Am 12. Juli 1998 isch dr Blatz vu dr Herrischrieder Klausenhof in Gerhard Jung Platz umgnännt wore.

Netzgleicher (Weblinks)

• Literatur vum un iber de Gerhard Jung im Katalog vu dr Dytsche Nationalbibliothek
• Laudatio uf dr Gerhard Jung uff de Internetsite vo Huse im Wisedal zue dr Verleihig vum Johann-Peter-Hebel-Priis