Georg Thoma

Stele vor dem Olympiastützpunkt in Freiburg

Dr Georg „Jörgli“ Thoma (* 20. August 1937 z Hinterzarte) isch e friejere dytsche Schyspringer un Nordische Kombinierer.

Ufgwagse isch dr Thoma as zweitjingschts vu sibe Chinder vun eme Schyylehrer un Wägwart uf em Wunderlihof z Hinterzarte. Wel d Familie arm gsi isch, het er scho frie miesse as Hirtebue Chie hiete. Speter het er as Holzfeller un Boschtbott gschafft.

Bi dr Olympische Spil 1960 z Squaw Valley/USA isch er as erschte Mitteleuropäer Olympiasiger in dr nordische Kombination wore. Vier Johr speter, an dr Olympische Winterspil 1964 z Innsbruck, het er d Bronzemedallie gwunne. Im glyche Johr isch er mit dr Holmenkollen-Medallie gehrt wore. Bi dr Nordische Schyyweltmeisterschaft 1966 z Oslo isch er Wältmeischter in dr Nordische Kombination wore.

Dr Thoma isch in dr Nordische Kombination vor allem im Springe stark gsi. Im Schyyspringe isch er drej Mol dytsche Meischter wore: 1960, 1961 un 1963. Anne 1960 isch dr Georg Thoma zum dytsche Sportler des Jahres gwehlt wore.

Noch syre Karriere as Sportler het er as Schyylehrer un Versicherigsagent gschafft.

Z Bad Griesbach het er anne 1989 dr Georg-Thoma-Pokal in s Läbe gruefe, e Summerspringe fir jungi Schyyspringer.

Mit syre Frau Annemarie het er e Dochter. Dr Georg Thoma isch dr Unkel vum Schyyspringer Dieter Thoma.

Dr Thoma het s Schwarzwälder Skimuseum grindet, wu syter 1997 im Hugehof z Hinterzarte isch. Är isch Ehreburger vu Hinterzarte.

Anne 1997 het er s Bundesverdienschtchryz iberchuu.

Literatur

• Gerd Jauch: Georg Thoma. Vom Hütejungen zum Skikönig, Freiburg im Breisgau 1990
• Gustl Berauer: Georg Thoma, Frankfurt/M. ; Wien: Limpert, 1961

Sunschtigi Uuszeichnige

• 1987 - Goldener Gong as Beschte TV-Kommentator vu dr Nordische Schyy-WM

Weblink

• Georg Thoma in dr Datebank vum Internationale Skiverband FIS (änglisch)
• Georg Thoma in dr Datebank vum Internationale Skiverband FIS (änglisch) Skisprungergebnis
• Georg Thoma in dr Datebank vu Sports-Reference.com (änglisch)
• Porträä, Daten un Biografi vu Georg Thoma in dr Hall of Fame des deutschen Sports (Link uf s „Register“, direkti Verlinkig nit megli)