Dr Basler Gare du Nord

Us der alemannische Wikipedia, der freie Dialäkt-Enzyklopedy

Koordinate: 47° 34′ 2,6″ N, 7° 36′ 25,7″ O; CH1903: 612681 / 268534

Logo
Dialäkt: Baseldütsch

Dr Basler Gare du Nord isch s erste Zentrum für experimentelli Muusig in dr Schwiz.

As «Baanhoof für Nöiji Muusig» isch er e Blattform für Komponiste, Interpreete und Ansambel us dr zitgenössische Muusigszeene. Es isch en ussergwöönlige Schbiilort, wo sich in de gschichtsdrächtige Rüüm vom ehemoolige Baanhoofbüffe im Badische Baanhoof z Basel befindet. Er het sit dr erste Säsong im Joor 2002 im Basler Kultuurlääbe si Blatz gfunde, wo sich Nöiji Muusig und iir Publikum chönne dräffe. As Muusigbaanhoof, Barbetriib und Dräffpunggt ladet dr Gare du Nord zur Zämmenarbet ii, wo Sparte und Gränze überschrited, und isch en Ort vom Ufbruch wie au vom Ufenthalt.

S Brogramm[ändere | Quälltäxt bearbeite]

Dr Muusigbaanhof Gare du Nord

S Brogramm umfasst e bräits Spektrum vo dr zitgenössische Muusig us em 20. und 21. Joorhundert, vo Kammermuusig über elektronischi Muusig bis zu aaspruchsvollem Dschääs. Es git öbbe 100 Veraastaltige pro Säsong und in deene wird im Gare du Nord komponierti und improvisierti Muusig in Form vo Konzärt, Dooninstallazioone und Muusigtheater gschbiilt.

Näbe vile äinzelne Brodukzioone git s Räijene, won em abwäggsligsriiche Schbiilblaan Strukduur gääbe: S Ansambel Phœnix Basel under dr musikalische Läitig vom Jürg Henneberger isch mit drei bis vier Konzärtbrogramm pro Säsong und eme äigene Brooberuum «ensemble in residence» im Gare du Nord drbii. D Räije «Nachtstrom» vo dr Muusig-Akademii Basel laadet regelmäässig Gest us em In- und Usland ii und git Studierende und Absolvänte vom Elektronische Studio e Möögligkäit, iiri Wärk vorzstelle. In dr Räije «Dialog» füert dr Marcus Weiss Gsprööch mit Musikerinne und Musiker. Gest, wo immer wider in Gare du Nord zruggchömme, si s Mondrian Ensemble Basel und d camerata variabile basel. D IGNM Basel und d Swiss Chamber Concerts biete e baar Mol in dr Säsong verschiideni Formazioone mit underschiidlige Brogrammschwerpünggt uf. As Konzärtsaal wäärend em Basler Clubfestival «BScene» (sit 2011) und em «Off Beat Jazzfestival Basel» (sit 2009) isch dr Gare du Nord au offe für aaspruchsvolli Muusig im populääre Beriich. Usserdäm git s immer wider Konzärt vo internazionale Star, wie öbbe vo dr bortugiisische Fado-Sängere Misia oder dr britische Satire-Band Tiger Lillies.

Sit 2004 git s dr Gare des Enfants, en äigene Brogrammberiich für Chinder und Jugendligi. Under dr künstlerische Läitig vo dr Sylwia Zytynska bietet dr «Gare des Enfants» e Räije vo mitrissende, experimentelle Theaterstück und Wörkschops aa, wo d Chinder nit nume zueluege, sondern vilmol au chönne mitmache.

Im gliiche Geböid und äng mit em Gare du Nord verchnüpft isch d Bar du Nord. Die Bar isch wäärend dr Säsong am Oobe und an de Wuchenänd offe.

Weblingg[ändere | Quälltäxt bearbeite]

Dä Artikel basiert uff ere fräie Übersetzig vum Artikel „Gare_du_Nord_(Basel)“ vu de dütsche Wikipedia. E Liste vu de Autore un Versione isch do z finde.