Freinet-Pädagogik

Länder uf de Wält, wos Verbänd für Freinet-Pädagogik git.

Es Chind schaffet i de Schueldrukkerei.

D Freinet-Pädagogik [fʀeˈnɛ-] isch e pädagogischi Bewegig. Si ghört zu de Reformpädagogik und isch 1920 vom Célestin Freinet z Frankriich gründet worde. Zäme mit sinere Frau, de Elise Freinet hät er probiert, d Schuel vo ine z verändere. Im Mittelpunkt vo der Freinet-Pädagogik isch immer s Chind.

De Gründer vo de Freinet-Pädagogik, de Célestin Freinet (1896-1966) isch en französische Leerer gsi. Er hät es Konzept entwicklet, won d Chind sälber schaffe tüend. Da dezu gits verschidnigi Wärchzüg und Arbetsegge, won d Chind eläige oder i chline Grüppli schaffed. S sälbständige Lärne funktioniert bim Freinet i allne Fächer: Wüsseschaft, Technologie, Huusufgabe, Kunst, Spraach oder Mathematik. Leerer won mit de Freinet-Pädagogik schaffed gits vor alem z Frankriich, z Belgie, z Holland, aber au z Tüütschland, z Öschtriich oder i de Schwiiz und i vilne andere Länder.

Eigenschafte

• S Klassezimmer isch ufteilt i "Atelier", aso Arbetsegge zu verschidene Themene.
• Jedes Chind häd en individuelle Arbetsplan, wos mit dem Leerer äinisch pro Wuche bespricht.
• D Arbetsbibliothek mit villne Sachbüecher und Tonträger zum Forsche.
• Karteicharte wo d Chind sälber chönd lärne und korrigiere.
• E Schueldrukkerei, won di äigete Text gsetzt und trukt wärded.
• E Wandziitig.
• Freie Uusdruk.
• En offne Stundeplan.
• De Schwärpunkt isch bi de individuelle Arbet vo de Schüeler.
• Einisch pro Wuche läset d Chind iri freie TExt vor.

Weblinks

• http://freinet.paed.com En umfangriichi Siite über Freinet-Pädagogik (tüütsch)
• http://fffp.de Forschigsstell für Freinetpädagogik vo de Universität Kassel
• http://www.freinet-kooperative.de Freinet-Verband z Tüütschland
• http://www.schuldrucker.de Schueldrucker z Tüütschland
• http://www.freinet.ch/ Freinet-Verband i de Schwiiz
• http://www.freinet.org Internationale Verband (französisch)
• Freinet-Pädagogik im Südtirol