Francesco Pipino

Us der alemannische Wikipedia, der freie Dialäkt-Enzyklopedy

Dr Francesco Pipino, au Francesco Pipino da Bologna (* öbbe 1270 z Bologna, † noch 1328 z Bologna) isch en italiänische Dominikaner und Archivar gsi. Er het Wärk über historischi, geografischi und juristischi Süsche verfasst. Er isch seer gleersam gsi, aber es gseet nid us, wie wenn er en ussergwöönligs literarischs Talänt gha het. Wichdig isch er vor allem, wil er im Marco Polo sis Wärk Il Milione uf Latiinisch übersetzt und es eso popularisiert het.

Dr Pipino isch dr Archivar und stellverdrätend Prior vo dr Chlosterchille San Domenico z Bologna gsi. 1320 het er e Pilgerräis ins Häilige Land und uf Konstantinopel gmacht und het denn d Örter, won er underwägs gsee het, in sim Tractatus de Locis Terrae Santae beschriibe.

Wärk[ändere | Quälltäxt bearbeite]

  • Iter Marci Pauli Veneti (öbbe 1302 ), en Übersetzig vom Marco Polo simm Räisebricht Il Milion.
  • Tractatus de Locis Terrae Santae (öbbe 1320), e Liste vo de Örter, won er uf sinere Pilgerräis 1320 bsuecht het.
  • Chronicon (öbbe 1322 ), e Kompilazioon vo historische Wärk vom dr Zit vom Karl em Groosse bis zum Papbst Klemens V.
  • Tabula privilegiorum Ordinis Fratis Praedicatorum (öbbe 1327), e Liste vo de Brivilegie, wo d Dominikaner vo de Bäbst überchoo häi.
Dä Artikel basiert uff ere fräie Übersetzig vum Artikel „Francesco_Pipino“ vu de italiänische Wikipedia. E Liste vu de Autore un Versione isch do z finde.