Flüsse der Schweiz

Us der alemannische Wikipedia, der freie Dialäkt-Enzyklopedy
Hops zue: Navigation, Suech

Wäge ihrer Topographi und em Riichtum a Wasser ("Wasserschloss vo Europa") befinde sich i dr Schwiiz sehr vili Flüss. Die Flüss hän über Joorduusige au zumene grosse Deil s hytige Bild vor Schwiiz prägt, will si - zämme mit de Gletscher i de letschte Yyszyyte die hitige Dääler bildet hän. Praktisch jedi Region vor Schwiiz wird dur e Fluss prägt.

Karte vo dr Schwiiz, mit de gröschte Flüss und Seene

D Schwiiz als Wasserschloss und Hauptwasserscheide[ändere | Quälltäxt bearbeite]

Dreifachwasserscheide am Lunghinpass

Praktisch alli wichtige Flüss vor Schwiiz entspringe im Gotthardmassiv, nämli vor allem dr Rhy, dr Rotte (au Rhone gnennt), d' Aare, d Rüüss und dr Ticino. Au d Linth entspringt zimli noch am Gotthardmassiv. Die andere prägende Flüss vor Schwiiz sin d Saane, dr Doubs, d Birs, d Thur und dr Inn. Birs, Aare, Saane, Reuss, Linth/Limmat und Thur sin dodrby Teil vom Flusssyschtem Hochrhy. Die Flüss sprudle a ganz verschiidene Ort ir Schwiiz us em Bode.

Vor allne andere wird d Schwiiz prägt dur dr Rhy (mit sim Hauptnäbefluss Aare) und dr Rotte, wo beid zu de drei grööschte Flüss vo Europa ghöre. Dur d Schwiiz verlaufe meereri europäischi Hauptwasserscheide: Si trenne d Yyzugsgebiet vo Nordsee, Mittelmeer und Schwarzem Meer. Sogar e dreifachi Hauptwasserscheide findet sich uff em Lunghinpass. D Idee, mit eme transhelvetische Kanal durs Mittelland zwische Rhy und Rotte d Nordsee unds Mittelmeer z'verbinde, isch nie umgsetzt worde.

Innerhalb vo dr Schwiiz het dr Rhy mit 375 km dr längscht Lauf, gfolgt vo dr Aare mit 295 km und em Rotte mit 264 km innerhalb der Schweiz.

Flusssyschtem Rhy[ändere | Quälltäxt bearbeite]

Rhy[ändere | Quälltäxt bearbeite]

Vorderrhyschlucht im Bündnerland
Rhyfall underhalb vo Schaffhuuse
Rhy z Basel, mitzt ir Stadt

Dr Rhy isch mit enere Lengi innerhalb vo dr Schwiiz vo 375 km dr lengscht Fluss vor Schwiiz. Mit all sine Näbeflüss het er Yyzugsgebiet vo 36'494 qkm - dodrmit verloot s Wasser vo 80 % vor ganze Flechi vor Schwiiz s Land bi Basel übere Rhy.

Dr Rhy het total 13 Quellflüssli, die wichtigschte sin Vorder- und Hinderrhy. Die beide fliesse bi Reichenau im Kanton Graubünde zämme. Allerdings duet nume dr Vorderrhy würkli us em öschtlige Gotthardmassiv entspringe. Dr Hinterrhy entspringt im Rheinwald in dr Nöchi vom San-Bernardino-Pass a dr Gränze zum Tessin - und dodrmit südlig vom Gotthardmassiv. Noch em Zämmefluss wändet sich dr Rhy in nördliger Richtig an Chur vrby em St. Galler Rhytal zue. Dodrby bildet er zerscht Gränze vor Schwiiz zem Fürschtetum Liechtenstein, drno, mit zwee Uusnaame, zem öschtriichische Bundesland Vorarlberg. Drno mündet er in Bodesee. Vo da a und bis Basel bildet er (usser z Schaffhuuse und z'Basel) d Gränze zue Dytschland.

Z Konstanz verloot er dr Bodesee gege Weschte zue. Grad noch Schaffhuuse, südlig drvo, zwüsche Neuhuuse und Laufe, befindet sich dr gröscht Wasserfall vo Mitteleuropa, dr Rhyfall. Bi Koblenz ströme Rhy und Aare zämme. Mit em Zuefluss vor Aare vergrössert sich d Wasserfiehrig vom Rhy um meh als Dopplete. Wiiter im Wesschte durfliesst dr Rhy - unterdesse zumene Strom gworde - d Stadt Basel und verloot d Schwiiz Richtig Norde, woner d Gränze vom Elsass zu Bade bildet, bis er denn i d Nordsee mündet.

Subflusssyschtem Aare[ändere | Quälltäxt bearbeite]

Aare[ändere | Quälltäxt bearbeite]

Yzugsgebiet vo dr Aare mit Zueflüss
Aare bi Bärn

D Aare isch dr wichtigscht Näbefluss vom Rhy, het e Lengi vo 295 km und es Yzugsgebiet vo 17'779 qkm. Si isch dodrmit dr lengschti rein schwiizerischi Fluss. Zuedäm isch si au dr Fluss mit am meischte Wasser, bim Zämmefluss mit em Rhy het si 50% mee Wasser als är. Do dr Rhy aber zem Zytpunkt, wo me d Flüss systematisch binännt het, wenigi Kilometer lenger gsi als d Aare, heisst dr Fluss bis zum Meer Rhy. Dur d Begradigung vom Rhy im St. Galler Rhytal und d Juragwässerkorrektion an dr Aare isch dr Rhy mittlerwiile kürzer und d Aare lenger worde. So isch hütte d Aare bim Zämmefluss lenger als dr Rhy und bringt au mee Wasser. Trotzdäm bliibt dr Name Rhy us historische Gründ.

D Aare entspringt im weschtliche Gotthardmassiv im Bärner Oberland und prägt s weschtliche Mittelland. Zwüsche Innertkirchen und Meiringen zwängt sich dr jung Fluss dur d Aareschlucht nordwärts. Einigi Kilometer witer fliesst sie zerscht in Brienzer- und denn in Thunersee. Drno durchquert si imene grosse Boge d Bundesstadt Bärn, um aschliessend dr Wohlensee zbilde. Bi Aarberg fliesst d Aare sit 1878 wäg dr Juragewässerkorrektion in nordöstlicher Richtig in Bielersee. Vo dört fliesst si in westlicher Richtig em Jura-Südboge entlang dur Soledurn und Olte, um sich bi Brugg im Wasserschloss mit Rüss und Limmat zu vereinige. Wenigi Kilometer nordwärts trifft d Aare denn uff e Rhy

Saane[ändere | Quälltäxt bearbeite]

Saane z Fribourg
Thur im Toggenburg

D Saane (frz. Sarine, 126 km / 1'892 qkm) entspringt bi Gsteig im westliche Bärner Oberland. Si fliesst zerst westwärts durs waadtländische Pays d'Enhaut, aschliessend noch Norde, wo sis Greyerzerland - u. a. mit em Greyerzersee - prägt. Sowiso isch d Saane dr Hauptfluss vom Kanton Fryburg und hüfig bildet er au d Sprachgränze. Nachdäm d Saane Fryburg und denn dr Schiffenensee durflosse het, fliesst si bi Aarbärg in d Aare.

Rüüss[ändere | Quälltäxt bearbeite]

D Rüüs (158 km / 3'425 qkm) isch dr prägend Fluss vor Zentralschwiiz. Er fliesst vom Gotthard här stetig noch Norden, bildet dodrbi s Urnertal, dur das die transeuropäischi Gotthardroute füehrt, und dr Vierwaldstättersee. Z Lozärn verloot d Rüüss dr See. Schliesslig mündet si im Wasserschloss bi Brugg in d Aare.

Linth / Limet[ändere | Quälltäxt bearbeite]

E bizz witer öschtlich entspringt bim Tödi d Linth (140 km / 2'416 qkm), wo gege Nordoschte zue die öschtlige Voralpe Richtig Walesee durchquert. Über e Linthkanal fliesst si drno in Zürisee. Am andere Änd bir Stadt Züri fliesst si - ab denn Limet gheisse - widr us em See und gege Nordweschte in Richtig Aare bim Wasserschloss z Brugg.

Thur[ändere | Quälltäxt bearbeite]

Nomoll witer öschtlig entspringt mit dr Thur (125 km / 1'724 qkm) dr gröscht Fluss vor Oschtschwiiz. Si prägt vor allem s Toggenburg, dr Thurgau und Teil vom Zürcher Hinterland. Churz noch em Rhyfall fliesst d Thur in Rhy.

Birs[ändere | Quälltäxt bearbeite]

Ganz churz vor Basel schliesslig fliesst d Birs (73 km / 924 qkm) in Rhy. D Birs entspringt im Berner Jura, durfliesst die jurassisch Hauptstadt Delsberg und bildet im Nordweschte vor Schwiiz innerhalb vom Jurahöhezug verschiideni Kluse und e markants Tal - s Laufental.

Rotte[ändere | Quälltäxt bearbeite]

Mündig vom Rotte in Genfersee
Blick ufs Quellgebiet vom Inn mit Silser- und Silvaplanersee

Dr Rotte, besser bekannt unter sim französische Name Rhone, isch in dr Schwiiz 264 km lang und het e Yzugsgebiet vo 10'403 qkm. Är entspringt uf dr weschtlige Syte vom Gotthardmassiv im Rhonegletscher und durfliesst dr Kanton Wallis: Zerscht durs Goms und denn vo Brig über Martigny (Fliessrichtig neu nordwärts) Richtig Gänfersee, woners Walliser Haupttal, s Rhonetal, bildet. Am andere Änd vom Gänfersee verloot dr Rotte dr See und durfliesst d Stadt Genf, verabschiidet sich drno grad vor Schwiiz und mündet schliesslig im Mittelmeer.

Ticino/Tessin[ändere | Quälltäxt bearbeite]

Dr Namensgäber vom Kanton Tessin, dr Ticino (dt. Tessin, 91 km, 1616 qkm), entspringt im südliche Gotthardmassiv, fliesst noch Süde dur dr nördlig und mittleri Teil vom Kanton Tessin (Sopraceneri), vereinigt sich mit dr Moësa, wo us em bündnerische Misox chuntt, ergiesst sich in Lago Maggiore (Langensee), wo au dr zweit bedütend Fluss vom Kanton Tessin, d Maggia, ynefliesst, und verloot über dr Lago Maggiore d Schwiiz. In Lago Maggiore fliesst au d Tresa, wo als Abfluss vom Luganersee grossi Teile vom Sottoceneri entwässeret. Dr Ticino fliesst schliessli im Süde us em Lago Maggiore und mündet in Po, wo am Änd in d Adria fliesst.

Inn[ändere | Quälltäxt bearbeite]

Dr Inn (104 km, 2150 qkm) entspringt bi Maloja im Engadin. Er fliesst dur Silser- und Silvaplanersee in Richtig Nordoste, verloot d Schwiz bi Vinadi und mündet im bayrische Passau in d Donau, wo ins Schwarze Meer fliesst.

Entwässerige vor Schwiiz näbe Rhy, Rotte, Ticino und Inn[ändere | Quälltäxt bearbeite]

Rhy, Rotte, Ticino und Inn entwässere zämme mit ihrne Zueflüss fasch die ganz Schwiiz. Es paar ehnder glaini Gebiet wärde aber no über anderi Flüss entwässeret. Im Nordweschte d Umgäbig vo La Chaux-de-Fonds und St. Ursanne und au d Ajoje dur dr Doubs (Richtig Mittelmeer); ganz im Südoschte vom Land s Münstertal (dur Rom und Etsch in d Adria), d Bündner Südtäler Puschlav (dur Poschiavino) und Bergell (dur Mera) und vom Comersee dur Adda und Po; im Süde die südliche und östliche Teil vom Mendrisiotto (dur Breggia und Comersee bzw. dur Gaggiolo und Olona) unds Zwischbergental südlich vom Simplonpasses (durs Grosse Wasser und d Diveria).

Flüss mit Quelle usserhalb vor Schwiiz[ändere | Quälltäxt bearbeite]

Mit Usnaam vo eim vo de 13 Quellflüss vom Rhy, em Reno di Lei, entspringt kei grössers Schwiizer Gwässer im Usland, aber doch es paar gleineri. S wichtigschte isch dr Doubs, witeri sin d Wiise, Birsig, Biber, Spöl, Faloppia, Melezza, Isorno und Arve.

Dä Artikel basiert uff ere fräie Übersetzig vu dere Version vum Artikel „Flüsse_der_Schweiz“ vu de dütsche Wikipedia.

E Liste vu de Autore un Versione isch do z finde.