Evangelische Landeskirche in Baden

Karte
Basisdate
Flächi:	ca. 15.000 km²
Leitender Geischtlicher:	Landesbischof Dr. Ulrich Fischer
Mitglidschaft:	UEK
Chillekreis:	2
Chillebezirk:	29
Chillegmeinde:	ca. 630
Gmeindsglider:	1.306.113 (31. Dezember 2005)
Aateil an dr Gsamtbevölkerung:	29,1 %
Offizielli Website:	www.ekiba.de/

Di Evangelischi Landeschile in Bade isch en uniirte Chile, des heisst si isch durch e Fusion vo de reformiirte und de lutherische Chile entschtande. Im Gägesatz zu vilne andere uniirte Chilene isch si ned ufgrund von ere Verwaltigsunion entschtande, sondern isch e Bekenntnis-Chile. De Sitz vo de Landeschile isch z Karlsrue und de Landesbischof isch de Ulrich Fischer.

Gschicht

Nach de Bildig vom Grossherzogtum Bade, hets im Gebiet drei verschidnigi Konfessione kha. De Grossherzog het aber es Interesse dra gha, zumindescht di beide protestantische Chilene z fusioniire. Au us de Gmeinde isch teilwiis sit em 1817 immer wider d Idee von ere Fusion ufcho. So het de Grossherzog im 1821i zu ere Synode iiglade, wo - obwohl di Reformiirte numme öppe en Drittel vo de Proteschtante usgmacht hei - beidi Konfessione gliichschtark verträte si gsi. S bsundrige an de badische Fusion isch gsi, dass di Chile es gmeinsams Bekenntnis reschpektiv gmeinsami Bekenntnis verabschidet hei und in de Frog vom Abigmahl - wo di Differenze zwüsche de Lutheraner und de Reformiirte am schtärkschte si gsi - s Gwüsse zu de oberschte Inschtanz erklärt hei. Im Einzelne het d Chile in de Unionsurkunde bi de Gründig folgendi Bekenntnis "namentlich und ausdrücklich" anerkennt:

• S Augschburger Bekenntnis
• De Heidelberger Katechismus und de chlii Katechismus vom Martin Luther
• Daderzu chunnt en eigene Abschnitt zu de Abigmaalsfroog, wo in acht Abschnitt es gmeinsams Abigmahlsverschtändnis duet formuliire, „ohne jedoch damit in Hinsicht der besonderen Vorstellungen darin die Gewissen binden zu wollen“.