Ephemerisierung

Efemerisierig isch e Begriff, wo dr Richard Buckminster Fuller brägt het, und wo d Tendänz vo dr hütige Technologii beschribt, Maschiine und technischi Aawändige immer chliiner, liichter und effiziänter z mache.

Dr Fuller het si Konzept mänggisch an Hand vo dr Entwicklig vo de Satellite beschriibe: s Gwicht vom ene Satellit isch nume e baar Hundertstel vo 750.000 Donne Dransatlantikkabel, aber er übernimmt deeren iiri Funkzionalidäät. Dr Dänker und Autor Steward Brand (äigentlig e Bioloog) het im Fuller si Konzept mit "Meer-mit-weniger-mache" in sim Buech Das Ticken des langen Jetzt überdräit.

E Däil vo dr Efemerisierig isch d Multifunkzionalidäät, e Brinzip, wo mä in dr Natur cha beobachte. Dr Fuller het die Multifunkzionalidäät as Basis vo dr "natürlige Technologii" aagluegt. Mä cha sääge, ass s Disäin vom "Meer dur Weniger" dur weeniger menschligi Chöste, weeniger Ressurse und weeniger Abfall verwirkligt wird.

Das Konzept cha mä bi elektronische Gräät gsee, bsundrigs bi sälle, wo sit dr Erfindig vom Dransister oder vom Silizium-Mikrodschip härgstellt worde si. S Brinzip cha au im Makrokosmos vo dr Archidektuur aagwändet wärde und bi andere Forme vom braktische Disäin, vo dr Konstrukzioon, vom Vercheer und in vile andere Fälder.

Dä Artikel basiert uff ere fräie Übersetzig vum Artikel „Ephemerisierung“ vu de dütsche Wikipedia. E Liste vu de Autore un Versione isch do z finde.