Emil Müller

Dr Emil Müller (* 10. Merz 1893 z Gälterchinde; † 7. Hornig 1974 z Lieschtl) isch e Schwizer Architekt und Politiker gsii. Är isch reformiert und Bürger vo Langebrugg gsi.

Sys Läbe

Dr Emil Müller isch dr Soon vom Emil Müller, Leerer, und dr Anna Schäublin gsi. Im Joor 1947 het är d Antonia Naldoni vo Palazzuolo, Italie ghürotet. Är isch in d Bezirksschuel z Böckte gange.

Sy Bruef

Dr Emil Müller isch z Lieschtl in e Bouzeichnerleer gange, drno het är am Technikum z Burgdorf es Architekturschtudium gmacht. Drufabe het är bi Boufirmene z Lieschtl als Architekt gschafft. In de früeje 40er Joore het är denn z Gälterchinde es eiges Architekturbüro ufdoo. Är isch Schetzigsbeamte vo dr Geböideversicherig Baselland gsi.

Politik un Militär

Dr „Müller Miggel“ isch im Kantonalvorschtand vo dr SP gsi. Är isch z Gälterchinde Mitglyd vo dr Gemeinikommission gsi. Drno isch är als Vizegmeinipresidänt im Gmeinrot gsässe und Presidänt vo dr Realschuelpfläg gsi. Vo 1943 bis 1963 isch är im Landrot gsässe. 1946/47 isch är Landrotspresidänt gsi. Im Joor 1955 isch är in Schtänderot gweelt worde, und bis 1967 Schtänderot gsi. Är het d Wydervereinig befürwortet und het vo 1960 bis 1969 s Amt vom erschte Presidänt vom Verfassigsrot vo beide Basel gha. Im Militärdienscht isch är Artilleryhauptmaa gsi und het in beide Wältchriege Aktivdienscht gleischtet.

Literarischi Verwys

• Basler Arbeiterzeitung vom 26. August 1963 und vom 12. Februar 1974
• Basler Nachrichten vom 11. Februar 1974
• Personenlexikon des Kantons Basel-Landschaft, bearbeitet vom Kaspar Birkhäuser, 1997, S. 115
• Fritz Grieder: Ein halbes Jahrhundert unter der Bundeshauskuppel: über Herkunft und Tätigkeit von 71 Basler und Baselbieter Parlamentariern, 1920-1970, 1985, S. 31

Extärne Verwys

• Jan Uebelhart: Müller, Emil. In: Historisches Lexikon vo dr Schwiiz.
• Müller, Emil im Personelexikon vom Kanton Basel Landschaft