Donauried

Us der alemannische Wikipedia, der freie Dialäkt-Enzyklopedy
S Sophieried im Schwebische Donaumoos

S Donauried isch e Flusslandschaft im weschtlige Bayern zwische Neu-Ulm un Donauwörth. Auwald bregt s Bild vu Ulm bis Lauinge. Wichtig sin derzue dr Stausee bi Faiminge, s Schwebisch Donaumoos zwische Ulm un Gundelfinge un d Gundelfinger Parklandschaft in däm Fychtgebiet vu dr Duene, wu no dr Ramsar-Konvention e internationali Bedytig het.

Vegel, Amfibie, Dejfelsnodle, Heigumper un Schmätterling finde Läbesryym in däne Nidermoos. E Deil im Donauried heimischi Pflanzenarte stehn as gfehrdet uf dr Rote Lischt. S git e baar Naturschutzgebiet, wu dr Arteryychtum solle bewahre. Glunge isch zem Byschpel in dr letschte Johr d Wideraasidlig vum Storch (Offinge, Gundelfinge, Lauinge, Höchstädt).

Di friejer moosig Ebeni isch wenig bsidlet, wird aber intensiv vum Mänsche gnutzt. Des het aagfange mit dr Flussbegradigung zwische 1806 un 1867 („Donaukorrektur“). Ziil isch doderby s Gwinne vu Grienland fir d Landwirtschaft gsi. Mit Hochwasserdämm isch speter gege Iberschwämmige vorgsorgt wore. Zwische 1961 un 1984 sin Staustapfle fir Wasserchraftwärch böue wore.

Im Donauried het s wärtvolli Chiisläger vun ere hegschte Qualitet. Dur dr Chiisabböu sin rund 700 Baggerseeä in dr Region entstande, wu im Summer Badgescht aalocke au us Gegnige, wu wyter ewäg sin.

Dur di schnäll Ableitig vum Grund- un Oberflechewasser in d Donau un d Yydiefig vun ere im Flussbett droht dr Grundwasserspiegel wyter abzsinke. Uf eire Syte chunnt des ere ökonomische Flechenutzig entgege, uf dr andere Syte wär des aber au e Bedrohig fir Naturlandschaft un d Artevilfalt im Donauried.

D Landeswasserversorgig, e Färnwasserversorger z Bade-Wirttebärg, bezieht Deil vu ihrem Drinkwasser us em Grundwasser vum Donauried.

Weblink[ändere | Quälltäxt bearbeite]

Dä Artikel basiert uff ere fräie Übersetzig vum Artikel „Donauried“ vu de dütsche Wikipedia. E Liste vu de Autore un Versione isch do z finde.