Distelfink

Tisteli
Tisteli (Carduelis carduelis)
Systematik
Ordnig: Spatzevögel (Passeriformes) Underordnig: Singvögel (Passeres) Familie: Finke (Fringillidae) Underfamilie: Tisteliartigi (Carduelinae) Gattig: Zislig (Carduelis) Art: Tisteli
Wüsseschaftlige Name
Carduelis carduelis
(Linnaeus, 1758)

S Tisteli (Carduelis carduelis; alemanischi Näme) isch e Zugvogel, wo in Mitteleuropa brüetet und mitti November as Mittelmeer flügt und erst mitti Mai zuruggchert. Wege sim höbsche Uussie und sim Gsang werd s au i Chefi ghalte.

Uussie

S Tisteli isch e bunte Vogel. S het e bruuni Obersiite und e schwarzi Flögel mit eme geele Straiffe und wiisse Flecke. De Chopf isch wiis, aber um de wissi Schnabel und um d Auge root und d Chappe isch schwarz. De Buuch isch wiislich mit hellbruune Flecke. Mandli und Wiibli gsiend gliich uus. Tisteli wered 12 bis 14 cm grooss, hend e Spannwiiti vo 21 bis 25 cm und wöget 12 bis 18 Gramm.

Lebeswiis

S Tisteli lebt i ufglockrete Laub- und Mischwälder, i Pärk und uf Fridhööf i Sidligsnööchi. S baut us Hälm, Wörzeli und Mies e Nest uf hööche Bömm und polsteret da mit Hoor und Wule uus. Tischteli fresset Söömli, Chnospe und Insekte. De Name het s wells, vor alem Söömli us de Tistle pike tuet.

Büecher

• Heinz Staffelbach: Handbuch Schweizer Alpen; Bern 2008.ISBN 978-3-258-06895-4
• Stefan Ineichen (Hrsg.): Stadtfauna, 600 Tierarten der Stadt Zürich; Bern 2010; ISBN 978-3-258-07561-7