Die Vögel Graubündens

Die Vögel Graubündens isch e Buech wo mit öppe 300 Vogelarte di ganzi Avifauna vom Bündnerland bischribt, nämli Vögel wo im Bündnerland brüetet und Zugvögel wo nume churz oder säsonal länger as Gast verwiilet. S Werch het de Aaspruch ali Vögel z erfasse wo i de Gschicht und i de Gegewart biobachtet wore sind. S Buech isch vo Ornithologe gschribe und redigiert wore aber populärwösseschaftlich uufgmacht und richtet sich en e braiti ornithologisch intressierti Öffetlichkait.

S Buch isch ane 2008 vom Verein vo de Bündner Buechverlääg zum «Buch des Jahres» gwäält wore.

Idee

Die Dokumentatio wött e «Momentaufnahme der sich ständig wandelnden Situation der Vögel im Kanton Graubünden» sii und «eine Grundlage für den Schutz der Vögel und ihrer Lebensräume bilden».

Gstaltig

Bi jedere Vogelart isch de tütsch, de italienisch und de rätoromanisch Name aaggee und dzue no de latiinisch-wösseschaftlichi, de französisch und de englisch name. Uufgfüert isch d Verbraitig z Mitteleuropa und i de Schwiiz und Diagramm zaiget s regionali Vorchoo und Zugbiweigige im Bündnerland. För jede Vogel gits no e Fötteli.

S Buech schlüüsst mit em Kapitel «Zur Geschichte der Ornithologie und des Vogelschutzes in Graubünden».

Bitailigti Institutione

Am Buech sind as Mitarbaiter dra bitailigt di Ornithologischi Arbitsgruppe Graubünde (OAG), wo 1977 gründet woren isch und im Uuftraag vom Kantoo handlet, und di Schwizerischi Vogelwarte Sempach.

Uusgoobe

• Christoph Meier-Zwicky, Hans Schmid: Die Vögel Graubündens, 3. Uflaag; Chur 2007, ISBN 978-3-85637-339-9

Weblink

• Uuszaichnig as Bündner Buch vom Joor 2008 graubuendenbooks.ch (Artikel chan zur Zit nüme gläse wärde)
• Vorstellig vom Buech uf de Siite vom Bündner Naturmueseum (Memento vom 17. Juli 2011 im Internet Archive)
• Die Vögel Graubündens uf naturmuseum.gr.ch