Dave Brubeck Quartet
 | ||
| Allgmeini Informatione | ||
| Genre | Jazz | |
|---|---|---|
| Gründig | 1951 | |
| Uuflöösig | 1967 | |
| Gründungsmitglider | ||
| Dave Brubeck | ||
| Paul Desmond | ||
| Joe Dodge (bis 1956) | ||
| Joe Morello (ab 1956) | ||
| Bob Bates (bis 1958) | ||
| Eugene Wright (ab 1958) | ||
S Dave Brubeck Quartet isch e Dschääs-Kwardett gsi, wo 1951 vom Dave Brubeck am Piano zämme mit em Paul Desmond am Saxofoon gründet worde isch. Si häi lang im Blackhawk Club z San Francisco gspiilt und si mit Album wie Jazz at Oberlin, Jazz Goes to College, und Jazz Goes to Junior College berüemt worde.
Gschicht[ändere | Quälltäxt bearbeite]
S Classic Quartet[ändere | Quälltäxt bearbeite]
Im Joor 1958, noch verschiidene Schlagzüüger und Bassiste, het sich s so genannte „Classic Quartet“ formiert, wo us em Brubeck, em Desmond, em Joe Morello am Schlaagzüüg und em Eugene Wright am Bass zämmegsetzt het und sich nüm gänderet het, bis d Bänd ufglööst worde isch. Im Joor 1959 het s Dave Brubeck Quartet si Album Time Out veröffentligt. Es si nume Originalkomposizione din gsi, und fast käini von ene isch im gwöönlige 4/4-Takt gstande. Es si Ditel wie „Take Five“, „Blue Rondo à la Turk“ und „Pick Up Sticks“ din gsi und s Album het schnäll dr Platinstatus erräicht. Au d Album wo denn choo si, Time Further Out (1961), Time in Outer Space und Time Changes häi vil Erfolg ghaa. Nid nume het s Kwardett in ene Experimänt mit ungwöönlige Taktarte gmacht, die Album si au bekannt drfür, as si uf iire Cover zitgenössischi Kunst zäige, under anderem vom Neil Fujita bi Time Out, Joan Miró bi Time Further Out, Franz Kline bi Time in Outer Space und Sam Francis bi Time Changes. E Höhepunkt für d Grubbe isch iir Läiv-Album us em Joor 1963 gsi, At Carnegie Hall, wo dr Kritiker Richard Palmer von em gsäit het, es sig im „Dave Brubeck si beste Ufdritt“ gsi.
S Dave Brubeck Quartet het sich im Joor 1967 ufglööst. Es isch für s 25-jöörige Jubiläum im Joor 1976 non emol zämmechoo.
S nöije Dave Brubeck Quartett[ändere | Quälltäxt bearbeite]
Dr Brubeck het au sust gärn in Kwardett gspiilt, öbbe as The New Brubeck Quartet (1977 - 1990er) mit drei vo sine Söön oder as The Dave Brubeck Trio & Gerry Mulligan (1968 - 1972). Sit em Aafang vo de 2000er säit dr Brubeck sinere Bänd mit em Bobby Militello (Saxofoon), em Michael Moore (Kontrabass) und em Randy Jones (Schlaagzüüg) wider The Dave Brubeck Quartet.
Diskografii[ändere | Quälltäxt bearbeite]
- Jazz at the College of the Pacific (1953) Fantasy Records
- Jazz at Oberlin (1953) Fantasy Records
- Jazz Goes to College (1954) Columbia Records
- Time Out (1959) Columbia Records/Legacy
- Time Further Out (1961) Columbia Records/Legacy
- Countdown Time in Outer Space (1962) Columbia Records
- Brandenburg Gate: Revisited (1963) Columbia Records
- Jazz Impressions of Japan (1964) Columbia Records/Legacy
- DBQ In Berlin (1964) Columbia Records
- Time changes (1964)
- Dave Brubeck's Greatest Hits (1966) Columbia Records/Legacy
- Time In (1966) Columbia Records
- Jackpot (1966, live in Las Vegas) Columbia Records
- Adventures in Time (1968) Columbia Records
- DBQ 25th Anniversary Reunion (1976) A&M Records
- The Dave Brubeck Quartet at Carnegie Hall (2001)
- The Columbia Years (2014) Not Now Music
|
Dä Artikel basiert uff ere fräie Übersetzig vum Artikel „Dave_Brubeck_Quartet“ vu de dütsche Wikipedia. E Liste vu de Autore un Versione isch do z finde. |