Comédie-Française

Us der alemannische Wikipedia, der freie Dialäkt-Enzyklopedy
D Comédie-Française (Salle Richelieu), Ändi 18. Jh.
Inneaasicht vo dr Salle Richelieu, Ändi 18. Jh.
D Comédie-Française (Salle Richelieu) hüte

D Comédie-Française (au Théâtre-Français) isch äins vo fümf Theater z Frankriich, wo dr Status vom ene Nazionaltheater (Théâtre national) häi. D Comédie-Francaise isch s äinzige vo dene Nazionaltheater, wo e fests Ensemble (la Troupe de la Comédie-Française) het. S Huus vo dr Comédie-Française befindet sich im 1. Bariser Arrondissement, em Arrondissement du Louvre.

Dr Naame vom Molière isch äng mit em Theater verbunde, wäge däm säit men em vilmol au La Maison de Molière (Im Molière si Huus). Es het immer e groosse Iifluss uf die franzöösischi Theaterlandschaft und d Schauspiilkunst ghaa.

D Comédie isch am 21. Oktober 1680 dur e Lettre de cachet vom Köönig Ludwig XIV. gründet worde. Scho am 24. August het s Ensemble, wo us 27 Schauspiiler bestande het, si ersti öffentligi Vorstellig gee: d Dragöödie Phèdre vom Jean Racine und e Komöödie vom zwäitrangige Schriftsteller Jean de La Chapelle (1651-1723). S Repertuar het vor allem us Stück vom Molière, Racine, Pierre Corneille, Paul Scarron und Jean de Rotrou bestande.

Während dr Französische Revoluzioon het dr Woolfaartsusschuss d Comédie-Française am 3. Septämber 1793 mit ere Verordnig gschlosse und d Schauspiiler verhaftet. Erst säggs Joor spööter, am 30. Mai 1799, get die nöji Regierig dä Beschluss ufghoobe und Vorfüerige im Richelieu-Saal (Salle Richelieu) erlaubt.

Am 25. Februar 1830 isch s bi dr Uruffüerig vom Victor Hugo sim Stück Hernani im Theater zur so genannte „Schlacht um Hernani“ choo. S Publikum isch gspalte gsi in d Aahänger vo dr französische Klassik und deene vo dr Romantik, wo s Stück vom Hugo äins vo de erste gsi isch drvoo. Schlussändlig häi d Aahänger vom nöiartige "romantische" Theater gwunne und Abwiichige vo de klassische Theaterregle si mee und mee verbräitet worde.

D Comédie-Française het hüte e Repertuar vo öbbe 3000 Theaterstück. Si het drei Theaterhüüser z Baris: dr Richelieu-Saal, s Théâtre du Vieux-Colombier und s Studio-Théâtre.

Litratur[ändere | Quälltäxt bearbeite]

  • Theodore Mure: Le Théâtre-Français de la rue de Richelieu. Histoire théâtrale. Brière, Rouen 1861 (elektronischi Fassig)

Weblingg[ändere | Quälltäxt bearbeite]

 Commons: Comédie-Française – Sammlig vo Multimediadateie

Koordinate: 48° 51′ 49″ N, 2° 20′ 9″ O

Dä Artikel basiert uff ere fräie Übersetzig vum Artikel „Comédie-Française“ vu de dütsche Wikipedia. E Liste vu de Autore un Versione isch do z finde.