Columban von Luxeuil

Us der alemannische Wikipedia, der freie Dialäkt-Enzyklopedy
Hops zue: Navigation, Suech
De St. Columban. Bobbio Abbey.

De St. Columban vo Luxeuil (*um 540 z Irland; † 23. November 615 z Bobbio, Italie) isch en irische Wandermönch gsii und ghört zu de erste Missionare vo de Alemane.

Er werd au Columban vo Bobbio oder Columban de Jüngeri gnennt und tar nöd mitem Columban vo Iona (521-597) verwechslet werde, wo z Schottland missioniert het.

s Lebe[ändere | Quälltäxt bearbeite]

Irland[ändere | Quälltäxt bearbeite]

De Columban isch um 540 im irische Landtail Leinster uf d Welt choo. Er isch Mönch wore und isch e Schüeler vom Abt Sinell wore und nochene vom St. Comgall, wo Abt im nordirische Chloster Bangor gsii isch. Spööter isch er de Laiter vo de Chlosterschuel vo Bangor wore.

Luxueil[ändere | Quälltäxt bearbeite]

Ane 591 isch er mit zwölf Schüeler uufbroche, drunder de St. Gallus, de Comininus, de Domoal, de Equonanus und de Eunocus. Si sind mitem Schiff a d Chüste vo de Bretagne gseglet und hend den vom fränkische König Childibert II. d Uufforderig öbercho, i de Vogese bim Ort Annegray (Dép. Haute-Saône) e Chloster z gründe. Die Gmainschaft isch schnell gwachse und drum hend si 15 km wiiter süüdlich bi Luxovium (Luxeuil) im Jura e nois Chloster gründet und spöter no ais z Fontanae (Fontaine). De Columban wo Abt vo Luxeuil gsii isch, isch under de Gunst vom König Childibert II. gstande. Won er aber dem sin Noofolger, de Theuderich II. kritisiert het, weg sinere Lebeswiis, het er müese noch guet 20 Joor sis Chloster im Jura verloo und er isch mit sinenen Jünger uf Austrasie zum König Theudebert II. und het e zittli am Königsho z Metz glebt.

Bregez[ändere | Quälltäxt bearbeite]

Ane 610 isch d Mönchsgmainschaft aber wider loszoge. Si sind vo Metz uf Mainz und denn em Rhii und de Limet no an Zörisee cho, wo si mitem Schiff uf Tugge gfaare sind. De Ort het em Columban gfale und d Missionare hend afange Zele baue. De Gallus het aber im Iifer di haidnische Tempel vo de Iihaimische aazunde. Drufabe hend d Wandermönch müese vo Tugge flüche und sind uf Arbe am Bodesee choo. Vo dai uus sinds mit em Schiff uf Bregez, wo si no im Joor 610 s "erscht tütschi Chlooster" ggründet hend.

D Biwooner vo Bregez hend aber i de Chile vo de St. Aurelia drai isigi Götterbilder ghaa und die nebetem Christegott vereert. De Gallus het die Statue aber gnoo und in See ine grüert und druf aber het sich e Tail vo de Bivölkerig bichere loo. D Alemane wo i de Umgebig glebt hend, sind aber no Haide gsii und amene Tag isch de Columban anes Bieropfer an Gott Wodan choo und het s Bierfass dör blosses Aapuste zerstört und so d Öberlegehait vo sinere Religioo offebaart. Doch isches mit de Ziit immer mee zu Konflikt mit de Iihaimische choo und im End sind zwee Mönche erschlage wore. De alemannische Herzog Gunzo, wo z Überlinge residiert het, het ene den as Herz glait, s Land z verloo. Dezue isch no choo as de König Theudbert II., de Bschützer vom Columban, vo sim Brüeder Theuderich II., e Find vom Columban, umbroocht woren isch. So hend d Mönch Bregez verloo und sind uf Italie. Nume de St. Gallus isch blibe und uf Arbe zrugg, woner im Urwald en Aisidelai ggründet het, am Ort vom spötere Chloster Sanggalle.

Italie[ändere | Quälltäxt bearbeite]

De Columban isch mit sinene Jünger uf Italie cho und de Agilulf, de König vo de Langobarde, het em erlobt, bi Bobbio e Chlosdter z gründe, woner am 23. November 615 gstorben isch. Um 640 het denn de Mönch Ionas vo Bobbio s Lebe vom St. Columban uufgschirbe.

Literatur[ändere | Quälltäxt bearbeite]

  • Sancti Columbani Opera. Ed. by G.S.M. Walker: The Dublin Institute for Advanced Studies, 1970.

Weblinks[ändere | Quälltäxt bearbeite]

 Allmänd (Commons): Columban vo Luxeuil – Sammlig vo witere Multimediadateie