Childebertus adoptivus

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Childebert III.
Regierigsziit 656 - 662
Name Childebertus adoptivus
Gstorbe 662
Vorgänger Sigibert III.
Dronfolg S Erb isch wider an e Merowinger gfalle
Nochfolger Childerich II.
Kgl. Huus Pippinide
Vater Dr Huusmeier Grimoald I.

Dr Childebert dr Adoptiert, hüfig latinisch Childebertus adoptivus, het as Childebert III. gregiert, sött aber nit verwächslet wärde mit em Childebert III. in de offizielle Liste. Er isch e Franke-König z Austrasie gsi vo 656 bis wohrschiinlig 662. Er het nit zum Herrschergschlächt vo de Merowinger ghört, sondern isch wohrschiinlig e Sohn vom Huusmeier Grimoald I us em Gschlächt vo de Pippinide, de spötere Karolinger gsi. Er isch vermuetlig 662 gstorbe.

Läbe[ändere | Quälltäxt bearbeite]

D Quellelag isch schlächt, aber es wird agno, ass dr Huusmeier Grimoald dr Sigibert III. (* 633 - † 1. Februar 656), wo denn no kei Sohn gha het, drzue brocht het, si eigene Sohn as Nochfolger z adoptiere, so wie s mit dr Adoption vom Childebert II., won eso Burgund übercho het, gangen isch. Im Grimoald si Bueb het dr merowingisch Name Childebert agnoh—si Geburtsname isch unbekannt. Denn het dr Sigibert 651 wohrschiinlig doch en eignige Sohn, dr spöter Dagobert II., übercho. Dr Grimoald isch mächdig gnug gsi, drfür z sorge, ass si Sohn Herrscher worden isch und ass dr Bischof Desiderius oder dr Dido vo Poitiers dr Dagobert in e Chloster z Irland gsteggt het. Dr Grimoald het also dr Dagobert nit lo umbringe, für zum en as Konkuränt uszschalte, wie das öfters in merowingische Ziite bassiert isch (lueg z.B. dr gwaltsami Dod vom Dagobert siim Neveu Childerich II.). Z Neustrie het men em Grimoald dr Prozäss gmacht und no im gliiche Johr (656/657) isch er hiigrichdet worde. Dr Childebert het sächs Johr gregiert, was wohrschiinli bedütet. ass d Adoption akzeptiert worden isch, vor allem villicht au, wil so Neustrie vo Austrasie unabhängig bliibe isch.

Es isch aber au möglich, ass dr Dagobert bis zum Johr 661 gherrscht het und dr Childebert erst denn für e Johr König worden isch. Vo dere Version dänggt me hüt im Allgemeine as si unwohrschiinlig siig.

Nochfolg[ändere | Quälltäxt bearbeite]

Noch em Ändi vo dr Regierigsziit vom Childebert isch nit dr Dagobert II. as König igsetzt worde, sondern dr minderjöhrig Neustrier Childerich II., dr Sohn vom Chlodwig II. und dr Balthild, wo mit em Sigibert und dr Chimnechild ihrer Dochter Bilichild verlobt worden isch; Regäntin für ihn isch d Chimnechild gsi. Dr Dagobert II. het noch em Childerich II. gregiert.


Dä Artikel basiert uff ere fräie Übersetzig vum Artikel „Childebertus_adoptivus“ vu de dütsche Wikipedia.

E Liste vu de Autore un Versione isch do z finde.