Bustrophedon

e schuelisches Biispiil vomene bustrophedon gschribne Teggscht uf Tütsch

d Gsetz vo Gortyn (5.Jh.v.Chr.) uf Kreta sind bustrophedon gschribe

Bustrophedon (agr. βουστροφηδόν, boustrophēdón "furchwendig") isch en Uudruck wo bruucht werd, wenn imene Schriftstuck d Schriibrichtig bi jedere Zile änderet. S Wort Bustrophedon isch e Zemesetzig us agr. βοῦς, bous "Rind" und στρέφειν, stréphein "wende, umcheere", und maint demit, d Art und Wiis wie mer bim Pflüege noch jeder Furche wende tuet.

S git zwoo Aarte: Wenn i zwoo Zile immer de Chopf vo de ante an Fuess vo de andere luegt, isch da echt bustrophedon. Falsch bustrophedon sait mer, wenn d Buechstäbe vo zwoo Ziile entweder d Chopf a Chopf liged oder Fuess a Fuess.

Bsunders im 6.Jh.v.Chr sind meriri altgriechischi und etruskischi Inschrifte bustrophedon gschribe wore. Au i anderne alte Schrifte chömet mengisch bustrophedon gschribni Tegscht vor. So isch de Runestai vom südnorwegische Tune (um 400 n.Chr.) bustrophedon bischriftet.