Burghölzli (PUK)
S Burghölzli, oder ofiziell di Psychiatrischi Universitätsklinik Züri (PUK), isch e psychiatrischi Klinik mit internationalem Ruef, wo zu de Uni Züri ghört. Si lit im Stadtzörcher Quartier Rieschpach.
Gschicht[ändere | Quälltäxt bearbeite]
De Arzt Wilhelm Griesinger, wo z Zöri de Laiter vo de Klinik för Inneri Medizin gsii isch, het d Idee ufbroocht, ases e moderni Klinik för Lüt bruuchi, wo psychisch chrank sind. 1864 het denn de Grossi Root vom Kantoo Zöri bischlosse, die "Irreastalt" nochem Konzept vom Griesinger z baue. D Klinik isch 1870 eröffnet wore und de ersti Direkter isch bis 1872 de Bernhard von Gudden gsi. Vo 1879 bis 1898 isch de Auguste Forel de Direkter gsii, wo sinerzit recht umstritte gsii isch, wel er d Gliichberechtigung vo Maa und Frau, d Strooffraihait vom Konkubinat und d Ehi zwüschet zwee gsunde Mane vertrete het. Anderersits isch er aber au för d Eugenik und d Zwangssterilisation itrete. Sin Noofolger bis 1927 isch de Eugen Bleuler gsii, wo sich bsundrigs mit de Schizophrenii beschäftiget het. Zu sinere Zit, nämli vo 1900 bis 1909, het de Psychoanalytiker Carl Gustav Jung im Burghölzli gschaffet. 1953 sind zerstmol Psychopharmaka igsetzt worde und i de Joore 1967 und 1968 het mer t Muure um d Klinik ume abproche.