Burg Kropfenstein

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Burg Chropfestei
Burg Chropfestei, vo Obersaxe us gseh

Burg Chropfestei, vo Obersaxe us gseh

Alternativname(n): Casti Grotta
Entstehigsziit: 1312
Burgetyp: Höhliburg
Erhaltigszuestand: Ruine
Ständischi Stellig: Unbekannti Zueordnig
Ort: Waltensburg/Vuorz, Graubünde
Geografischi Lag 46° 46′ 10″ N, 9° 6′ 4″ O46.7694444444449.10111111111111130Koordinaten: 46° 46′ 10″ N, 9° 6′ 4″ O; CH1903: 726976 / 181152
Höchi: 1.130 m
Burg Chropfestei (Schweiz)
Burg Chropfestei
S Wappe vo de Herre vo Chropfestei

D Ruine vo der Burg Chropfestei lit uf em Gebiet vo der Gmeind Waltensburg/Vuorz in der Surselva im schwiizerische Kanton Graubünde. Chropfestei isch näbe dr Jörgebärg, dr Grüenefels und dr Vogelbärg eini vo de ursprünglig vier Burge z Waltensburg.

Lag[ändere | Quälltäxt bearbeite]

D Burg lit westlig vo de Gmeinde Waltensburg und Brigels, an der Kante von ere Felswand, wo sänkrächt abfallt, und me bruucht vom westlige Ändi vo Waltensburg öppe e Viertelstund zu Fuess für zum anezcho.

Alag[ändere | Quälltäxt bearbeite]

Plan vo der Alag

Me chunnt zum Iigang in dr lange Muure, wo drei Stockwärk hoch isch, nume uf eme steile, schmale Wägli vo Oste her. Das isch in de 1950er Johr währed ere Restaurierig verbreiteret und mit eme Gländer gsicheret worde. Das Projekt isch d Initiative vom Bürger vo Waltensburg Paul Gabriel, wo noch Kanada usgwanderet isch, gsi und au vo ihm finanziert worde.

Noch dendrochronologische Undersuechige stammt d Alag vom Afang vom 14. Johrhundert us em Johr 1312. Hiwiis druf, ass es e Vorgängerbau ge het, git s nit.

D Innemuure und Deil vom Dach wärde vom überhängende Felse bildet. D Balkelager vom früehjere Zuegang cha me hüt no gseh. Es het es niidrigs Iigansdor wo in d Alag füehrt. In dr Muure über em Dor het s e Viereggfänster und e Schiessluke. Dr östlig Deil vo der Alag isch e schmale Schluuch, wo öbbe 1,5 bis 2 m breit isch und dürft wohrschiinlig, wil er so äng isch, as Speicher und zur Verdeidigung bruucht worde si.
D Südwand isch mehrfach broche und em natürlige Verlauf vo der Felswand agliche. Es het dört mehreri Schartefänster zur Belüchtig und Viereggfänster in dr Grössi vo öbbe 70 uf 50 cm.

Im westlige Deil, wo sächs Meter breit isch, si d Wohnrüüm gsi. An de Räste vo de Quermuure, Balkelöcher, Fänster mit Sitznische, eme Aborterker in dr Westwand und eme Schüttstei im zweite Stock cha me die früehjeri Iideilig gseh. E Relief, wo in dr Ruine gfunde worden isch und won e Maa mit eme churze Rock zeigt, isch jetzt im Rätische Museum; e Kopii drvo isch im Waltensburger Ortsmuseum usgstellt.
S Innere vom Baudrakt isch mit zwei Quermuure iideilt gsi, vo dene si no d Fundament übrig. D Holzbalke, wo deilwiis no vorhande si, si abgsägt worde. Vo däm cha me schliesse ass dr Abbruch plant gsi isch und s Holz hätt sötte abtransportiert wärde. Als Dach chunnt e Pultdach in Frog, wo ruggwärts an dr Felse abaut isch.

Weblingg[ändere | Quälltäxt bearbeite]

 Allmänd (Commons): Burg Kropfenstein – Sammlig vo witere Multimediadateie
Dä Artikel basiert uff ere fräie Übersetzig vum Artikel „Burg_Kropfenstein“ vu de dütsche Wikipedia.

E Liste vu de Autore un Versione isch do z finde.