Bund von Brunnen

Us der alemannische Wikipedia, der freie Dialäkt-Enzyklopedy
Hops zue: Navigation, Suech

Nach de Schlacht am Morgarte, wo für die alte Eidgenosse erfolgriich gsi isch, händ sich d Verträter vo de vier Ur-Kantön Uri, Schwyz, Ob- und Nidwalde z Brunne troffe und de alti Bund, wo si schomal aafangs Augschte 1291 erneuerte gha händ, neu z bestäätige. Das isch am 9. Dezämber 1315 gsi.

De alti Bund, wo de Legände naa uf em Rüütli schwoore worden isch, häd de Schriiber, vermuetli de Lüütprieschter vo Altdorf, uf latinischer Sprache gschribe gha. Jetzt aber, das isch es Novum in de Schwiizer Geschicht, isch de nöi Bundesbrief uf tüütsch geschribe worde. Wiso si sich grad z Brunne troffe händ isch nöd klar. Waarschindli wil me mit em Schiff vo allne Kantön gäbig det anechunt.

Inhalt[ändere | Quälltäxt bearbeite]

Im Wäsentlige cha mä dr Bundesbrief vo 1315 in drei Theme gliidere:

  • Gegesitigi Hilf (uf eigeni Choste), falls ei Eidgenoss aagriffe wurde oder ihm wurd Unrächt gscheh, und d Reglig drüber, ass mä e fremde Herr nume gmeinsam wurd aaneh und nit ohni d Zuestimmig vo de andere (daz sich unser Lender enkeines noch unser enkeiner beherren sol oder dekeinen herren nemen ane der ander willen und an ir rat.)
  • Überiikümft zur Kontrolle und zum Verhalte bi Verhandlige gege usse, d Bestimmig, ass sich Richter ihr Amt nit döfe chaufe und d Überiikumft, ass sich alli Eidgenosse verpflichte, bi Strit oder Chrieg gegen ussen underenander z schlichte.
  • Usserdäm git s der Bundesbrief stroofrächtligi Bestimmigen zur Art, wie mä mit Verbräche wie Dodschlag usw. well umgoh.