Brot für alle

s Logo vo Brot für alle

Brot für alle (Bfa) isch s Schwiizer Hilfswerk vo de reformiirte Chile vo de Schwiiz. Es isch im 1971 entschtande, het aber sini Aafäng in Spändekampagne gha, wo s erschti Mol im 1960i schtattgfunde het.

Gschicht

Unter Name Brot für Brüder isch im Johr 1960 d Idee von ere Spendekamgane in de Schwiiz entschtande, wo vom Leiter vom HEKS, em Pfarrer Heinrich Hellstern, und em Inschpektor vo de Basler Mission, em Hermann Witschi, lanciirt worde-n-isch. Im 1961 het d Abgordneteversammlig vom SEK d Aktion Brot für Brüder eistimmig gnemiget. Zwüsche 1961 und 1971 het es drü Sammelkampagne gäh, wo sehr erfolgriich si gsi. Die erscht Kampagne het 16 Millione Franke iibrocht, di zweiti 13 Milklione und di dritti 19.6 Millione. Im 1971 isch Brot für Brüder zu ere permanente Iirichtig worde, mit einere zentrale Aalaufstell, wo drü Ufgabeberiich übernoh het: Information und Bewusstsiisbildig, d Mittelbeschaffig für Entwickligsprojäkt und d Prüefig vo de Projäkt. Sit em 1974i het s Hilfwerk en vollamtliche Generalsekretär. Im 1991 isch de Name vo Brot für Brüder in Brot für alle gändret worde und im 1992 het d Organisation d Stiftig Max Havelaar lanciirt, wo bis hüt in de Schwiiz s bekanntischti Label für fir ghandelti Produkt isch. Im 2004 isch Brot für alle in e Stiftig umgwandlet worde.

Sit em 1969 werdet d Sammlige zämme mit de römsich-katholische Organisation Faschteopfer durchgführt. Di engi ökumenischi Zammenarbet isch sither an wichtiger Teil vo de Kampagne, wo immer in de Passionsziit stattfinde. Di beide Organisatione hei sich immer wider uf politischer Ebeni iigsetzt, wenn si zur Erkenntnis sind cho, dass d Mönscherächt bedroht sind.

Quelle

• Website vo de Organisation
• Peter Hug: Brot für alle In: Historisches Lexikon vo dr Schwiiz.