S Atommodäll vom Bohr

S Atommodäll vom Wasserstoffatom noch em Bohr (Z = 1). Wenn s Elektron vo dr 3. zur 2. Kräisbaan gumpt, sändet s Atom e Foton mit dr Energii $\Delta E=hf$ us.

S Atommodäll vom Bohr isch s erste Atommodäll gsi, wo vo vile Füsiker anerkennt worde isch, und enthaltet Elimänt vo dr Kwantemechanik. Dr Niels Bohr het s 1913 entwigglet. Bi däm Modäll bestöön d Atom us eme schwere, positiv gladnige Atomkärn und liichte, negativ gladnige Elektrone, wo uf gschlossnige Baane une e Atomkärn umekräise. Mit drei Postulat het dr Bohr innerhalb vom Modäll die klassischi Füsik zum Däil usser Chraft gsetzt. Anders as elteri Atommodäll beschribt s Modäll vom Bohr e Hufe vo de Äigeschafte, wo am Wasserstoffatom beobachtet worde si. Aber e Hufe Detäi bi de spektroskopische Mässige wärde von em nit erfasst. Es cha au chemischi Bindige nit erkläre. Au stoot s Konzept vo Elektrone, wo sich uf änge Baane um e Kärn bewege, im Widerspruch zur Unscherfirelazioon. Aber s Atommodäll vom Bohr het dr Wääg vorberäitet, zum d Atomhülle z verstoo.

Wil s eso äifach isch, sich vorzstelle, ass d Elektrone um e Atomkärn kräise wie Blaneete um d Sunne, isch das für Joorzäänt s populäre Bild vom Atom bliibe und au hüte no cha mä s uf Logo und Karikature gsee. Kwantemechanischi Atommodäll, wo vo öbbe 1925 aa entwigglet worde si, gseen für Elektrone käini Baane vor, sondern Ufenthaltswoorschinligkäite.

Litratuur

• Niels Bohr: On the Constitution of Atoms and Molecules, Part I. In: Philosophical Magazine. 26, 1913, S. 1–25
• Niels Bohr: On the Constitution of Atoms and Molecules, Part II Systems Containing Only a Single Nucleus. In: Philosophical Magazine. 26, 1913, S. 476–502
• Niels Bohr: On the Constitution of Atoms and Molecules, Part III Systems containing several nuclei. In: Philosophical Magazine. 26, 1913, S. 857–875
• Niels Bohr: The spectra of helium and hydrogen. In: Nature. 92, 1914, S. 231–232
• Niels Bohr: Atomic Structure. In: Nature. 107, 1921, S. 104–107
• Michael Eckert: Die Geburt der Modernen Atomtheorie. In: Physik in unserer Zeit. 44(4), 2013, S. 168

Weblingg

 Commons: Im Bohr si Atommodäll – Sammlig vo Multimediadateie

• Netchemie Periodensystem Animierti Daarstellig vo alle Elimänt noch em Modäll vom Bohr
• ChemGlobe – Bohrsches Atommodell (Site cha nüme abgrüeft wärde; Suche im Webarchiv)[1] [2] Vorlage:Toter Link/www.chemglobe.org
• Vorstellung des Bohrschen Atommodells im Video alteso.de erklärt s Atommodäll vom Bohr.
• Bohrsches Atommodell – eine Einführung für die Schule (Universität Ulm) (Memento vom 10. Februar 2010 im Internet Archive)

Fuessnoote

Dä Artikel basiert uff ere fräie Übersetzig vum Artikel „Bohrsches_Atommodell“ vu de dütsche Wikipedia. E Liste vu de Autore un Versione isch do z finde.