Birsfelden

BW

Wappe
Basisdate
Kanton:	Baselland
Bezirk:	Arlese
BFS-Nr.:	2766
PLZ:	4127
Koordinate:	47.553333 n. Br. 7.62333333 ö. L.
Höchi:	259 m ü. M.
Flächi:	2.52 km²
Iwohner:	10.389 (31. Märze 2011) [1]
Website:	www.birsfelden.ch
Karte
fwwww

Birsfälde (offiziell Hochdütsch: Birsfelden) isch e politischi Gmeind im Bezirk Arlese im Kanton Basel-Landschaft in dr Schwiiz.

Geographii

Birsfälde lit 259 m ü.M. an dr Mündig vo dr Birs in Rhii. Es isch d Gmeind im Kanton Baselland, wo am diefste lit. Au dr diefst Punggt im Kanton befindet sich z Birsfälde, uf 246 Meter ü.M. an dr Birsmündig. D Birs bildet d Gränze zur Stadt Basel im Weste; im Norde und Nordoste isch dr Rhii die natürligi Gränze zu Basel und Rieche (Kanton Basel-Stadt) und zu Gränzach-Whyle (Dütschland). Im Oste und Süde gränzt Birsfälde an Muttez. Zur Gmeind ghöre au s Wasserchraftwärk Birsfälde und dr Birsfälder Hafe am Rhii. Birsfälde isch mit dr Tramlinie 3 mit Basel und mit de Buslinie 70 und 80 au mit Liestel verbunde.

D Flechi vo dr Gmeind bedräit 252 Hektare, drvo si 81 % Siidligsflechi, 18 % Landwirtschaftsgebiet und 1 % Wald.

Wappe

Uf em Wappe vo Birsfälde het s drei gäli Stärn, wo under eme wiisse Wällebalke uf rotem Grund stöhn. Die drei gäle Stärn symbolisiere dr Flurname Stärnefäld, währed dr Wällebalke d Birs darstellt.

Gschicht

Fund us dr Stei- und dr Bronzeziit und Räst von ere römische Warte im Stärnefäld belege die früechi Besiidlig an dr Birsmündig. Dr Birsfälder Hof isch scho im Hochmittelalter bekannt gsi und het de Grafe vo Homberg und em Chloster St. Alban z Basel ghört. Noch em Bau von ere feste Holzbrgg über die Birs 1425 het sich uf em Birsfäld e chliini Brggesiidlig entwigglet. Dr gross Ufschwung isch aber erst noch dr Basler Kantonsdeilig im Johr 1833 cho, wo d Birs d Kantonsgränze und Birsfälde e Zollort worde si. Wirtshüüser mit Ställ und Fuehrhaltereie mit Rösser si entstande. Dank siiner günstige Verchehrslag in dr Nöchi vom früehje Industriiviertel Dalbedal, hai sich do au vili Arbeiter niderglo. Birsfälde het lang zur Gmeind Muttez ghört und het erst 1874 dr Status von ere eigeständige Iiwohnergmeind übercho. Ab 1923 isch dr Flugplatz Basel uf em «Stärnefäld» gsi und Birsfälde isch mit em ganze europäische Luftverchehrsnetz verbunde gsi. 1950 isch dä «international» Flugplatz z chlii worde und me het en noch Blotzheim verleit, wo dr jetzig EuroAirport Basel-Mulhouse-Friburg entstanden isch.

Dr Name Birsfälde leitet sich vo de früechere Fälder an dr Birs ab. In dr lokale Umgangssproch sait me Birsfälde au "Blätzbums". Noch offizielle Erklärigsversuch stammt dä Name vom früechere Flugplatz uf em Stärnefäld, wonoch mit "Blatz" dr Flugblatz und mit "Bums" dr Lärm, wo d Flugzüüg gmacht hai, gmeint siige. Es isch aber wahrschiinliger, ass dr Name us mittelalterlige Ziite stammt. Denn zumol isch s Dalbedoor in dr Basler Stadtmuure z Nacht zue gsi, und so hai sich d Züg vo de Händler bis noch Birsfälde gstaut. Prostituierti hai die Situation usgnützt und dr potenzielle Kundschaft ihri Dienst uf de Fälder abote; die vulgäri Bezeichnig isch in dr Umgangssproch denn für s ganze Dorf überno worde und isch bis hüte verbreitet.

Wirtschaft

Zsämme mit de Arealen St. Johann und Chleihüninge und em Auhafe Muttez bildet dr Birsfälder Hafe d Rhiihäfe vo beide Basel. Zsämme hai die e Flechi vo über 1,3 Mio. m². Z Birsfälde befindet sich au dr Hauptsitz vom Vitra und von Delica.

Bevölkerig

Birsfälde het e chli meh as 10'000 Iiwohner. 30 % vo dr Bevölkerig si römisch-katholisch und 27 % reformiert. Dr Usländeradeil beträit 23.9 %.

Politik

Dr siibechöpfig Gmeindirot vo Birsfälde isch us de folgende Persone zsämmegsetzt:

• Claudio Botti (Gmeindpräsident/CVP)

Präsidials und Sicherheit: Personalwäsen, Iibürgerige, Information, Iwohnerdienst, Wahle und Abstimmige, Füürwehr, Polizei, Zivilschutz, Katastrophevorsorg (GFS)

• Peter Buser (Vizepräsident/SVP)

Diefbau: Verchehr, Strosse, Umwältschutz, Abfallbesitigung, Sportplätz, Sporthalle, GGA, Wasserversorgig, Abwasserbesitigung, Friidhof, Energii, Fischerei

• Walter Märki (SP)

Finanze: Finanze, Stüüre, Versicherigswäse

• Jakob Nussbaum (FDP)

Hochbau: Hochbau, Ortsblanig, Wohnbauförderig, Liigeschaftsverwaltig, Grundbuech- und Katasterwäse

• Ursula Roth Somlo (SP)

Bildig, Jugend und Kultur: Schuelwäse, Logopädii, Vorschuelheilpädagogik, Chinder- und Jugendzahnpfläg, Dräffpunkt Lavater, Robinsonspiilblatz, Dagesheim und Dagesfamilie, Mittagsdisch, Kultur

• Brigitte Schafroth (SP)

Sozials: Sozialhilf, Vormundschaft, Sozialberotig, AHV-Zwiigstell, Spitex, Alters- und Pflägheim

• Claude Zufferey (SVP)

Sport und Wirtschaft: Schwümmhalle, Durnhalle, Sportblätz, Sporthalle, Gwärb- und Wirtschaftsförderig, Märt, Informatik, Arbetssicherheit, Schiesswäse

• Walter Ziltener (Gmeindverwalter, nit Mitgliid vom Gmeindirot)

Partnergmeind isch Plan-les-Ouates.

Sehnswürdigkeite

S Chraftwärk

• s Birsfälder Museum
• s Chraftwärk Birsfälde, mit sine beide Schleusebecki für d Rhiischifffahrt und d Chraftwärkinsle, 1953/54 baut vom Hans Hofmann
• s Birschöpfli, e bekannts Erholigsgebiet
• d Bruederchlauschille, 1957-1959 baut vom Hermann Baur, beiflusst vom Le Corbusier siiner Wallfahrtskapälle z Ronchamp
• s Vitra Center, s Verwaltigsgebäud vo dr Design-Möbel-Firma vom kalifornische Architekt Frank Gehry

Weblink

 Allmänd (Commons): Birsfelden — Witeri Mulitimediadateie zum Artikel

• Offizielli Website vo dr Gmeind Birsfälde
• Gmeind Birsfälde Blog
• Artikel Birsfelden im Historische Lexikon vo dr Schwiiz
• Chraftwerk Birsfälde

Dä Artikel basiert uff ere fräie Übbersetzig vum Artikel „Birsfelden“ vu de dütsche Wikipedia. E Liste vu de Autore un Versione isch do z finde.