Basilius Amerbach

Us der alemannische Wikipedia, der freie Dialäkt-Enzyklopedy
Dialäkt: Baseldütsch

Dr Basilius Amerbach (* 1. Dezämber 1533 z Baasel; † 25. April 1591 z Baasel) isch e Jurist und Kunstsammler us Baasel gsi. Er isch dr äinzig Soon vom Bonifacius Amerbach gsi.

Lääbe und Wärk[ändere | Quälltäxt bearbeite]

Vo 1552 bis 1559 het er z Tübinge, z Padua, z Bologna und Bourges Rächt studiert. 1560 het er z Bologna dr Doggter gmacht. Denn het er z Speyer am Riichskammergricht e juristischs Braktikum absolviert. Er het as Leerer und Rächtskonsulänt gschafft. Vo 1561 isch er Brofässer an dr Uniwersidäät Baasel und isch sofort Räkter worde. Da Boste het er denn no drei Mol, 1566, 1580 und 1588, ghaa. 1581 isch er Stadtsyndikus gsi.

Im Basilius Amerbach si Münzeschränkli

Dr Amerbach het sich au für Numismatik intressiert und e gröösseri Münzesammlig aagläit. Er isch en Alterdumsforscher gsi und e Spezialist für römischi Epigrafik. Er het dr Aastooss gee zur Usgraabig vom römische Theater vo Augusta Raurica, wo as ersti wüsseschaftligi Usgraabig nördlig vo de Alpe gältet und die klassischi Archeologii dört begründet het.

Er het e Wunderkammere, s sogenannte Amerbachkabinett ufbaut, und het in däm Zämmehang under Anderem em Kunstmooler Hans Bock em Eltere Ufdreeg gee.

Vo iim stamme handschriftligi Dissertazioone und e Briefsammlig. Druckti Schrifte von em si käini bekannt.

Familie[ändere | Quälltäxt bearbeite]

Dr Basilius Amerbach dr Jüngeri isch dr Soon vom Bonifacius Amerbach gsi. Er het sich 1561 mit dr Esther Rüdin verhürootet. Iire Soon Bonifaciolus isch 1562 as Buschi gstorbe, won er vier Möönet alt gsi isch, am gliiche Daag wie si Mueter.

Lueg au[ändere | Quälltäxt bearbeite]

S Amerbachs.

Litratuur[ändere | Quälltäxt bearbeite]

  • Rochus von Liliencron: Amerbach, Basilius. In: Allgemeine Deutsche Biographie (ADB). Band 1, Duncker & Humblot, Leipzig 1875, S. 397.
  • Alfred HartmannAmerbach, Basilius d. J.. In: Neue Deutsche Biographie (NDB). Band 1, Duncker & Humblot, Berlin 1953, ISBN 3-428-00182-6, S. 246 f.
  • Die Amerbachkorrespondenz, bearbäitet und uusegee im Ufdraag vo dr Kommission für die Öffentligi Bibliothek vo dr Uniwersidäät Baasel vom Alfred Hartmann, [ab Bd. 6] uf Grund Material, wo dr Alfred Hartmann gsammlet het bearbäitet und uusegee vom Beat Rudolf Jenny u. a., Bd. 1-11, Verlag der Universitätsbibliothek, Basel 1942-2010, ISBN 978-3-7965-1846-1, ISBN 978-3-7965-1037-3.
  • Elisabeth Landolt (Hg): Beiträge zu Basilius Amerbach. Basel Öffentliche Kunstsammlung 1991.
  • Hans-Rudolf Hagemann: Die Rechtsgutachten des Basilius Amerbach. Basel 2001, ISBN 3-7965-1701-3.

Weblingg[ändere | Quälltäxt bearbeite]