BScene

Us der alemannische Wikipedia, der freie Dialäkt-Enzyklopedy
Dialäkt: Baseldütsch

D BScene isch e zweidägigs Musikfestival, wo sit 1997 jedes Johr z Basel in dr Schwiiz stattfindet.

Dr Verein «BScene – Das Basler Clubfestival», wo s Festival organisiert, isch us em Umfäld vom Rockförderverein (RFV) entstande und isch am 2. April 1996 as gmeinnützige Verein gründet worde. S Ziil vom Verein isch s gsi, mit eme Festival in Basler Clubs, zerst no under em Name «Songtage der Region Basel», d Musigszene vo dr Stadt Basel, vo de Gmeinde drum ume und vo dr Region Dreiländeregge (Schwiiz-Dütschland-Frankriich) z fördere. In dere Musigszene si mit Bands und Einzelkünstler wie de Lovebugs, Kalles Kaviar, GurD, Black Tiger, Brandhärd, The Scrucialists, Whysome, Undergod oder Mañana au Bands vo nationaler und internationaler Bedütig entstande.

Über 250 Bands hai sit 1997 an dr BScene gspiilt. Bis ins Johr 2005 hai hedes Johr abwächselnd grossi und chliini Usgoobe vom Festival stattgfunde. Sit em Jubileumsjohr 2006 git s jedes Johr e grossi Usgoob in bis zu nüün Clubs.

Währed dr Schwerpunkt vom Festivalprogramm immer no uf de lokale Bands lit, hai in de letschte Johr internationali Acts d Attraktivität vom Festival erheblig vergrösseret, so isch 2008 im Rahme vo dr BScene in dr Kasärne die dänischi Band Dúné ufdräte. 2008 isch au e Bsuecherrekord ufgstellt worde: Mit öbbe 7'000 Bsuecher isch BScene das Johr s grösste Klubfestival in dr Schwiiz gsi.

2011 het d Bscene wider in dr Kasärne, em Parterre, em Volkshuus, dr Voltahalle, dr Gare du Nord und andere Klüb und Sääl stattgfunde, im ganze fufzäh, säggs meh as im Johr vorhär. 8'500 Zueschauer si drbii gsi und hai öbbe sibzig Bands zuegloost, wo vo eim Klub zum andere zooge si.[1]

Fuessnote[ändere | Quälltäxt bearbeite]

  1. 8500 Zuschauer an der Jubiläumsausgabe (Site cha nüme abgrüeft wärde; Suche im Webarchiv)[1] [2] Vorlage:Toter Link/www.20min.ch, abgrüeft am 25. Juli 2011

Weblingg[ändere | Quälltäxt bearbeite]