Bürgergemeinde

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Eidgenössisches Wappe
Gmainde i de Schwiz

D Bürgergmäind (regional au Burger-, Ortsbürger- bzw. Ortsgmäind) isch e Personalkörperschaft vom öffentlige Rächt in dr Schwiz. Zu iire ghööre usschliesslig natürligi Persone, wo dr Status vom ene Bürger häi und eso s Häimeträcht vo dr (Bürger-)Gmäind, unabhängig vo iirem aktuelle Woonort

D Bürgergmäinde underschäidet mä vo de politische Gmäinde (wo men e au Iiwoonergmäinde säit), de Schuelgmainde und de Chillegmäinde. Wil d Mobilidäät vo de Lüt sit dr erste Helfti vom 19. Joorhundert immer grösser worde isch, verliert d Bürgergmäind an Bedütig und mit ere s Gmeindibürgerrächt.

In de Kantöön Nidwalde, Schwyz, Appezäll Innerrhode, Nöieburg, Gämf und Waadt git s käini Bürgergmäinde. Nidwalde, Schwyz und Appezäll Innerrhode kenne aber privaträchtlig organisierti Korporazioone, wo in vilem wie Bürgergmäinde funkzioniere. Hüt existiere in dr Schwiz no knapp 2000 Bürgergmäinde und Korporazioone.[1] Au dr Kanton Züri kennt käini Bürgergmäinde, aber in drei Gmäinde git s immer no bürgerligi Güeter.

In mängge Kantöön het mä d Bürgergmäinde in de politischen Gmäinde scho integriert oder isch draa s z mache. In de Kantöön Bärn, Jura und Soledurn zum Bischbil existiere nääbenenand Gmäinde, wo d Iiwooner- und d Bürgergmäind drennt si, und au Gmäinde, wo si scho zämmegläit si (sogenannt Gmischti Gmäinde oder Äinhäitsgmäinde). Im Kanton Glarus si d Tagwe (Tagwärk, Fronarbet oder Gmainwärk) uf e 1. Januar 2011 abgschafft und in die ordentlige Gmäinde integriert worde.

Weblingg[ändere | Quälltäxt bearbeite]

Fuessnoote[ändere | Quälltäxt bearbeite]

  1. Website vom Verband vo de Bürgergmäinde und Korporazioone
Dä Artikel basiert uff ere fräie Übersetzig vum Artikel „Bürgergemeinde“ vu de dütsche Wikipedia.

E Liste vu de Autore un Versione isch do z finde.