Armin Zweite

Us der alemannische Wikipedia, der freie Dialäkt-Enzyklopedy

Dr Armin Zweite (* 14. Mai 1941 z Ellerwalde, Westpreusse) isch e dütsche Kunsthistoriker und Museumsdiräkter.

Läbe[ändere | Quälltäxt bearbeite]

D Familie vom Zweite isch 1945 uf Flensburg gflüchdet. Zwüsche 1960 und 1967 het er an de Universidete z Kiel, Tübinge und Göttinge Philosophii, Gschicht, Kunstgschicht, Psychologii und Germanistik studiert, spöter au z Brüssel und z Berkeley. 1974 het er z Göttinge über s Thema «Studien zu Marten de Vos. Ein Beitrag zur Geschichte der Antwerpener Malerei in der 2. Hälfte des 16. Jahrhunderts» promoviert.

Vo 1974 bis 1990 isch er Diräkter vo dr Stedtische Galerii am Lenbachhuus z Münche gsi. Won er aagfange het isch er nume 33 gsi und dr jüngsti Museumsdiräkter in Dütschland. 1990 het er as Nochfolger vom Werner Schmalenbach d Leitig vo dr Kunstsammlig Nordrhii-Westfale übernoh. Im Herbst 2009 het er siis Amt an Marion Ackermann wiitergee, wo früehner am Kunstmuseum Stuttgart gsi isch. Under dr Ägide vom Zweite isch d Kunstsammlig Nordrhii-Westfale vor Allem um Skulpture, Installatione und Fotografie vo internationalem Rang ergänzt worde. Im Früehlig 2002 isch d Sammlig K21 drzue cho, wo sich dr modärne Kunst vom spoote 20. und vom 21. Johrhundert widmet.

Dr Zweite isch 1983, 1985 und 1987 dr dütsch Kommissar für d Biennale vo São Paulo gsi. Sit 2001 isch er Kuratoriumsmitgliid vo dr Jürgen Ponto-Stifdig vo dr Dresdner Bank. Er isch Mitkurator vo dr Usstellig «Aktuell 83» gsi. Dr Zweite het 2009 Düsseldorf verloo und isch uf Münche gange. As Grund het er d Verzögerig bim Erwiiterigsbau für d Landesgalerii z Düsseldorf aagee.[1] Dr Zweite isch Leiter vo dr Sammlig Brandhorst worde. S Museum Brandhorst, wo drfür baut worden isch, isch im Mai 2009 eröffnet worde.

Dr Zweite het Bücher über die zitgenössischi Kunst gschriibe und het Biidräg zu über 70 Kunstkatalög und Usstellige gmacht.

Fuessnote[ändere | Quälltäxt bearbeite]

  1. Birgit Sonna: Überraschender Abgang. In: art-magazin vom 16. November 2007. Abgrüeft am 29. Januar 2011

Weblingg[ändere | Quälltäxt bearbeite]