Aquitanien

Us der alemannische Wikipedia, der freie Dialäkt-Enzyklopedy

Technische Yschränkung:
Dr koräkt Titel wär: »Aquitanie«

**Aquitaine**
Basisdate


Verwaltigssitz	Bordeaux
Präsident vom Regionalrot	Alain Rousset PS
Bevölkerig – gsamt 2006 – Dichti	3.099.000 Iiwohner 70 Iiwohner/km²
Flechi – gsamt – Adeil an Frankriich:	41.308 km² 6,5 %
Département	5
Arrondissement	18
Kantön	235
Gmeinde	2.296
ISO 3166-2-Code	`FR-B`

Aquitanie (franz. Aquitaine [akiˈtɛn]) isch e historischs Gebiet und hüte e Region im Südweste vo Frankriich. Es wird im Süde von de Pyrenäe und im Weste vom Atlantik begränzt.

[ändere] Geografii

D Region gränzt im Norde an d Region Poitou-Charentes, im Nordoste an d Region Limousin, im Oste an d Region Midi-Pyrénées, im Süde an Spanie und im Weste an dr Atlantisch Ozean. Si umfasst dr grösst Deil vom aquitanische Becki, e Landschaft wo rächt flach und geologisch jung isch; si wird hauptsächlig vo dr Garonne, dr Adour, dr Dordogne, dr Charente und ihri Näbeflüss entwässeret. Die Flüss hai sehr jungi Sedimänt aglageret. Nume im üsserste Nordoste und im Süde het s hügligi oder gebirgigi Gegende: Am Nordostrand vo der Region lit die ersti Steilstufe vom Zentralmassiv, an dr Gränze zu Spanie erhebe sich d Pyrenäe, wo dört scho meh wie 2000 m hoch si. Zwüschen em Zentralmassiv und em Kärngebiet vom aquitanische Becki befinde sich usdehnti, relativ niidrigi Chalchplateaus mit Usläufer bis grad vor Bordeaux.

S Klima isch – abgseh vo de Hochlage – s ganze Johr duure mild. An dr Atlantikküste bedräit d Johresdurchschnittstämpratur über 15 °C, z Bordeaux öbbe 14 °C, an dr Gränze zum Limousin immer no 11 °C. Die Underschiid siis Resultat vo de milde Winter in dr Nöchi vo dr Küste. D Niiderschleg si relativ hoch und nähme gege Süde zue immer meh zue. Si falle vor allem im Winterhalbjohr.

D Bodebeschaffeheit isch vilfältig: D Flussniiderige si meistens sehr fruchtbar, au s Vorland vo de Pyrenäe. Zwüschen ihne isch dr Bode aber meistens arm: d Chalchböde im Nordoste si guet für e Wiibau und spezialisierti Kulture wie Drüffle, Nüss und Obst, si aber wäge ihrer Durchlässigkeit nit geignet für en Ackerbau.