Anna Maria Strada

Us der alemannische Wikipedia, der freie Dialäkt-Enzyklopedy
Hops zue: Navigation, Suech
D Anna Strada

D Anna Maria Strada del Pò (* z Bergamo; † villicht z Bergamo) isch en italiänischi Sopranistin in dr erste Helfti vom 18. Joorhundert gsi. Mä wäiss von ere us de Joor zwüsche 1719 und 1741, hauptsächlig im Zämmehang mit em Georg Friedrich Händel, wo si z London bin e Hufe vo sine Opere uf dr Büüni gstande isch.

Si het iiri Karriere z Italie aagfange und het u. a z Venedig in dr Opere vom Antonio Vivaldi La verità in cimento (1720) gsunge und isch au z Mailand und z Livorno ufdräte. Dr Händel het d Strada 1729 für sini 2. Opereakademii angaschiert. Dört het si d Adelaide in sinere Opere Lotario gsunge und isch vo denn aa im Händel si Primadonna in alle sine Opere serie und Oratorie bis 1737 gsi. Zu iire Rolle häi au d Angelica in Orlando ghöört, d Ditelrolle in Partenope, d Elmira in Sosarme, d Tusnelda in Arminio und d Arianna in Giustino. Si isch die äinzigi vo de füerende Sänger vo dr Royal Academy gsi, wo im Joor 1733 nit zur Konkurränz, dr Opera of the Nobility gange isch.

D Anna Strada het 1738 London verloo und isch uf Italie zrugg, wo si denn z Neapel zämme mit iirem Londoner Kolleeg Senesino ufdräte isch und denn z Turin gsunge het, bis si 1741 in iiri Geburtsstadt Bergamo zrugg isch.

Kwelle[ändere | Quälltäxt bearbeite]

  • Clapton, Nicholas: Anna Maria Strada del Pò in: Landgraf, Annette und Vickers, David: The Cambridge Handel Encyclopedia, Cambridge University Press 2009, ISBN 978-0-521-88192-0, S. 619f
Dä Artikel basiert uff ere fräie Übersetzig vum Artikel „Anna_Maria_Strada“ vu de dütsche Wikipedia.

E Liste vu de Autore un Versione isch do z finde.