S Anatomische Museum Basel

Us der alemannische Wikipedia, der freie Dialäkt-Enzyklopedy

Koordinate: 47° 33′ 53,1″ N, 7° 34′ 47,9″ O; CH1903: 610637 / 268236

Dialäkt: Baseldütsch
Dr Iigang vom Anatomische Museum

S Anatomische Museum Basel isch e Museum in dr Schwizer Stadt Basel, wo Originalpreparaat und Waggsmodäll vo menschlige Körperdäil und Orgaan zäigt. Es isch an dr Pestalozzistrooss 20 und ghöört zu de Baasler Kulturgüeter vo nazionaaler Bedütig.

D Sammlig[ändere | Quälltäxt bearbeite]

S Museum isch im Joor 1824 vom Profässer Karl Gustav Jung gründet worde. Das früeje Gründigsdatum erkläärt die üsserst umfangriichi Sammlig vo historische Preparaat, drunder e Skelett, wo dr Andreas Vesal 1543 prepariert het und s eltiste anatomische Preparaat uf dr Wält isch, und en anders Skelett us em Joor 1573 vom Felix Platter.

Speziell us dr Gründigszit vom Museum isch e groossi Sammlig vo Waggsmodäll. Drnääbe wärde e Hufe modärni Preparaat in dr Duurusstellig zäigt, wo zämme mit de historische Exponaat en Überblick über die menschligi Anatomii und en Iiblick in d Witerentwicklig vo de wüsseschaftlige Methode vermittle. Äinzelni Beriich in dr Anatomii wärde in Sonderusstellige zäigt.

D Exponaat si süstematisch aagordnet und mä cha sä so liichter in Grubbe iidäile und noochenander studiere. So si zum Bischbil d Bluetgfääss diräkt näbe de Usstelligsstück über s Härz und d Näärve grad näben em Hirni. Dank dr Verbindig us Noochbildige, Modäll und Originaal cha mä dr Ufbau vo de verschiidene Däil vom Körper und wie si funkzioniere guet verstoo. Die gnaue wüsseschaftlige Daarstellige wärde dur Glänkmodäll ergänzt und ufglockeret, wo dr Bsuecher an ene sälber cha usbrobiere wie si funkzioniere und so besser cha verstoo.

Näbe de andere Abdäilige in dr Usstellig, wo von ere churze Gschicht vom Museum über d Anatomii vom Mensch und über d Entwicklig vom Skelett, vo alle Orgaan, vom Närvesüsteem und de Bluetgefäss goot, wird detalliert au uf abnormi Entwicklige iigange. En andere intressante Däil vo dr Usstellig bilde die künstlige „Ersatzdäil“ und Implantaat, wo kaputti Däil vom Körper ersetze und so d Lääbenskwalideet verbessere und d Lääbenserwartig chönne verlengere. Dank dr Uusstellig vo dene Exponaat überchunnt mä uf dr äinte Site e klaarers Bild vom Fortschritt vo dr Medizintechnik und vo deren iire witere Entwickligsmöögligkäite und uf dr andere Site zäigt si em Bsuecher, wo d Gränze vo deene technische Mögligkäite si.

Lueg au[ändere | Quälltäxt bearbeite]

Weblingg[ändere | Quälltäxt bearbeite]

Dä Artikel basiert uff ere fräie Übersetzig vum Artikel „Anatomisches_Museum_Basel“ vu de dütsche Wikipedia. E Liste vu de Autore un Versione isch do z finde.