Anaklet

Us der alemannische Wikipedia, der freie Dialäkt-Enzyklopedy
Anaklet, bildligi Darstellig.

Dr Anaklet (au Anenkletus, Anakletus, Anacletus, Cletus, Anencletus) (* Rom; † 13. Juli 88 (?) z Rom) isch dr dritt Bischof vu Rom gsii, wahrschyns au idäntisch mit em Papscht Kletus.

Läbe[ändere | Quälltäxt bearbeite]

Anaklet isch unter Sklave ne seli verbraitete Name gsii, doderdur cha mer zmindescht ebis iber syy soziali Stellig vor syym Pontifikat as Papscht sage.

Dr Eusebius vu Caesarea, dr Irenäus vu Lyon, dr Augustinus un dr Optatus vu Mileve hän Kletus un Anaklet as di nämlig Person aagluegt, sin sich aber nit ainig gsii iber d Raiefolg vu dr erschte Bischef vu Rom: dr Irenäus nännt Linus, Anaklet, Clemens. Dr Augustinus un Optatus dergege nänne Linus, Clemens, Anaklet. Dr Liberianisch Katalog, Carmen contra Marcionem, dr Liber Pontificalis un s katholisch Mässbuech gän aa, dass Anaklet un Kletus verschideni Persone sin. No ihnen isch dr Kletus dr Noofolger vum Linus vu 76 bis 89 gsii, dr Anaklet däm sy Noofolger as Papscht un sei anne 91 gstorbe.

No ander Katalog isch dr Anaklet zwelf Johr Bischof vu Rom gsii (eppe 77 bis 88, no andere Quälle scho syt 76) un isch as Märtyrer am 13. Juli 88 gstorbe. Des isch aber e Legänd; sälbscht dr Mythos, är heeb 25 Presbyter uf Rom chuu loo, wu iber em Grab vum Petri e Dänkmol errichte loo heebe, isch scho lang dur wisseschaftligi Chänntnis widerlait. Vum Anaklet här chunnt di no hite giltigi Bstimmig, ass Bischef vu drei andere Bischef sotte d Weie iberchuu, d Prieschter dergege vu ihrene aigene Bischef.

Syni Reliquie wären in d Chilche vum Hailige Linus (Vatikanstadt) ufbhalte.

E mänkmol wird er au mit dr remische Zahl I. nummeriert; des isch aber unnetig, wel sy ainzige Noofolge im Name, dr Anaklet II., e Gegepapscht gsii isch.

Gedänkdag[ändere | Quälltäxt bearbeite]

Dr Feschtdag vum Hl. Kletus isch dr 26. April, fir dr Anaklet wird au dr 13. Juli gnännt.

Syy Name bedytet: dr Erläse (griech.-latyn.)

Literatur[ändere | Quälltäxt bearbeite]

  • Friedrich Wilhelm Bautz: Anaklet I. In: Biographisch-Bibliographisches Kirchenlexikon (BBKL). Band 1, Hamm 1975, Sp. 155.
  • Ytrag in d Catholic Encyclopedia, Robert Appleton Company, New York 1913 (änglisch)
  • J. N. D. Kelly: Reclams Lexikon der Päpste. Verlag Reclam. ISBN 3-15-010588-9

Weblink[ändere | Quälltäxt bearbeite]

 Commons: Anacletus – Sammlig vo Multimediadateie
Dä Artikel basiert uff ere fräie Übersetzig vu dere Version vum Artikel „Anaklet“ vu de dütsche Wikipedia. E Liste vu de Autore un Versione isch do z finde.