Alfred Sisley

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Dr Alfred Sisley

Dr Alfred Arthur Sisley (* 30. Oktober 1839 z Bariis; † 29. Januar 1899 z Moret-sur-Loing) isch e franzöösische Mooler vom Impressionismus gsi.

Lääbe[ändere | Quälltäxt bearbeite]

Dr Sisley isch z Frankriich as Soon vo änglische Chauflüt uf d Wält cho. Si Vater het im Handel mit Südamerika e Vermööge gmacht. Noch dr Schuel häi si dr Alfred 1857 uf London gschickt, zum dört dr Bruef vom ene Chaufmaa z leere. Er het aber lieber welle Künstler wärden und isch dorum 1862 uf Bariis zrugg. Dört isch er bim Mooler Charles Gleyre go leere und het dr Pierre-Auguste Renoir und Claude Monet kennegleert. Er isch mit bäide s ganze Lääbe lang befründet gsi.

Im Juni 1866 het er e Bezieig mit dr Marie[1] Lescouezec aagfange, wo au under em Naame Eugénie[2] Lescouezec bekannt gsi isch, und het sä 1897 ghürootet. Si häi zwäi Chinder gha.

Im Sisley sini erste künstlerische Vorbilder si die änglische Landschaftsmooler us em früeje 19. Joorhundert gsi, wie dr William Turner, dr John Constable und dr Richard Parkes Bonington, won er Bilder von ene z London gsee het, und spööter die franzöösische Mooler Jean-Baptiste Camille Corot und Gustave Courbet. Im Pariser Salon vo 1867 het er zum erste Mol en äignigs Gmäld usgstellt, het sich sber vo 1870 aa immer mee de Impressioniste und iirem Moolstiil zuegwändet.

Blick uf e Kanal Saint-Martin, 1870
D Seine bi Bougival, 1876

Im Dütsch-Franzöösische Chrieg vo 1870/1871 het d Familie Sisley iir Vermööge verloore, wo bis denn dr Alfred drvo gläbt het. Dr Sisley isch zu sim Dood arm bliibe, au wenn er e baar Bilder het chönne verchaufe, u.a. im Édouard Manet und im Sänger Jean-Baptiste Faure. Au häi en dr Kunsthändler Paul Durand-Ruel und dr Kritiker Théodore Duret understützt und eso het er si Familie und sich finanziell chönne über Wasser halte.

1874 isch er mit fümf Landschaftsbilder an dr Erste Impressioniste-Usstellig drbii gsi. 1879, won er Gäld brucht het, het er s no äinisch mit em Salon brobiert, d Schüri het aber si Bild nid aagnoo. 1882 het er 27 Gmäld an ere Grubbenusstellig vo de Impressioniste zäigt.

Dr Sisley het im Geegesatz zu andere Impressioniste as schüchtern gulte, dr Vincent van Gogh het von em im ene Brief an si Brueder gschriibe, er sig dr schüchternsti und samftisti vo de Impressioniste. Zu sine Läbzite het er nie die künstlerische Beachtig überchoo, won er verdient het.

Sit 1895 het am Cheelchopfchräbs glitte und isch im Joor 1899 draa gstorbe. Sini Fründ Renoir und Monet si zum Begrääbnis cho. Dr Camille Pissarro het churz vor sim Dood über en gschriibe, er sig e groosse und herrlige Künstler und er mäini, ass er de bedütendste Mäister ebebürdig sig.[3]

Wärk[ändere | Quälltäxt bearbeite]

Berüemt si vor allem im Sisley sini Bilder vo dr Seine und iire Brugge in de domoolige Bariiser Vorstedt. Im Geegesatz zum Renoir und Monet, wo vilmol die gliiche Motiiv gmoolt häi wie dr Sisley, si d Landschaften und d Ortschafte bi iim in Momänt vo Rue daargstellt. Im Lauf vo de Joor häi sich d Chraft, dr Usdruck und d Intensidäät vo de Farbe in sine Bilder versterkt. Bis zu sim Dood isch dr Sisley em impressionistische Stiil in siner äigene, chraftvolle Moolwiis dröi bliibe.

E baar vo sine Wärk[ändere | Quälltäxt bearbeite]

Bild Ditel Entstande Gröössi, Materiaal Usstellig/Sammlig/Bsitzer
Alfred Sisley 036.jpg Chestenenallee in dr Celle-Saint-Claude 1865 125 × 205 cm, Ööl uf Liinwand Musée du Petit Palais Bariis
Alfred Sisley - Street of Marlotte aka Women Going to the Woods.jpg D Strooss vo Marlotte 1866 65 × 92 cm, Ööl uf Liinwand Bridgestone Museum of Art z Tokyo
Alfred Sisley 026.jpg Dr erst Schnee z Louveciennes 1870 54 × 73 cm, Ööl uf Liinwand Museum of Fine Arts z Boston
Sisley-Bridge at Villeneuve-la-Garenne.jpg Brugg bi Villeneuve-la-Garenne 1872  ??, Ööl uf Liinwand Metropolitan Museum of Art z Nöi York
Alfred Sisley 023.jpg Dorf am Ufer vo dr Seine 1872 59,2 x 80 cm, Ööl uf Liinwand Eremitaasche z Sankt Petersburg
Alfred Sisley 043.jpg S Maschinehuus für d Pumpi z Marly 1873 46 × 65 cm, Ööl uf Liinwand Ny Carlsberg Glyptotek z Kopehaage
Alfred Sisley The Road to Hampton Court 1874 Neue Pinakothek Munich München.JPG Dr Wääg uf Hampton Court 1874 Ööl uf Liinwand Neue Pinakothek z Münche
Alfred Sisley 009.jpg D Brugg vo Hampton Court 1874 46 × 61 cm, Ööl uf Liinwand Wallraf-Richartz-Museum z Köln
Alfred Sisley 066.jpg Under dr Brugg vo Hampton Court 1874 50 × 76 cm, Ööl uf Liinwand Kunstmuseum z Winterthur
Alfred Sisley 062.jpg Überschwemmig z Port-Maly 1876 60 × 80 cm, Ööl uf Liinwand Musée des Beaux-Arts z Rouen
Alfred Sisley 065.jpg S Ufer vo dr Seine im Herbst 1879 46 x 65 cm, Ööl uf Liinwand Städelsches Kunstinstitut z Frankfurt am Main
Alfred Sisley 057.jpg Stillääbe, Druube und Nüss um 1880 38 × 55,5 cm, Ööl uf Liinwand Museum of Fine Arts z Boston
Alfred Sisley 032.jpg Hüüser am Ufer vo dr Loing 1889 33 × 41 cm, Ööl uf Liinwand Brivaatsammlig
Alfred Sisley 064.jpg S Ufer vo dr Loing bi Moret 1892 73 × 92 cm, Ööl uf Liinwand Brivaatsammlig
Alfred Sisley 042.jpg Dr Loing-Kanal 1892 60 × 74 cm, Ööl uf Liinwand Musée d’Orsay z Bariis
Alfred Sisley 038.jpg D Chille vo Moret 1893 65 × 81 cm, Ööl uf Liinwand Musée des Beaux-Arts z Rouen
Alfred Sisley 020.jpg Dr Strauschoober 1895 60 × 73 cm, Ööl uf Liinwand Sammlung Acquavella Galleries z Hamburg

Liddratuur[ändere | Quälltäxt bearbeite]

  • Die großen Impressionisten. Revolution in der Malerei, hrsg. v. Bruce Bernard. München: Delphin 1987. ISBN 3-7735-5323-4
  • Raymond Cogniat: Sisley. München: Südwest-Verlag 1982. ISBN 3-517-00759-5
  • Vivienne Couldrey: Alfred Sisley. The English Impressionist. Newton Abbot, Devon: David u. Charles 1992. ISBN 0-7153-9920-9
  • François Daulte: Alfred Sisley. München: Schuler 1975. ISBN 3-7796-5051-7
  • François Daulte: Sisley - les saisons. Paris u.a.: Bibliothèque des Arts 1992. ISBN 2-85047-184-4
  • Jean Leymarie u. Michel Melot: Französische Impressionisten. Das graphische Werk von Manet, Pissarro, Renoir, Cézanne, Sisley. München: Hirmer 1972. ISBN 3-7774-2490-0
  • Richard Shone: Sisley. London: Phaidon Press 1999. ISBN 0-7148-3892-6
  • Carola Lepping: Huldigung an Sisley. Norderstedt: Books on Demand GmbH. ISBN 3-8334-1878-8

Fuessnoote[ändere | Quälltäxt bearbeite]

  1. Wallraf-Richartz-Museum & Fondation Corboud (Hrsg.): Auguste Renoir: Das Paar (Les fiancés). (http://www.wallraf.museum/index.php?id=227, abgruefe am 18. November 2011).
  2. Beate Eickhoff: Alfred Sisley kommt!. In: Musenblätter. (http://musenblaetter.de/artikel.php?aid=9082&suche=Sisley, abgruefe am 18. November 2011).
  3. Bruce Bernard, Die großen Impressionisten, S. 94

Weblingg[ändere | Quälltäxt bearbeite]

 Allmänd (Commons): Alfred Sisley – Sammlig vo witere Multimediadateie
Dä Artikel basiert uff ere fräie Übersetzig vu dere Version vum Artikel „Alfred_Sisley“ vu de dütsche Wikipedia.

E Liste vu de Autore un Versione isch do z finde.